Ha ka sien nyngkong ïakynduh lang ki longkpa ka Synjuk ki Seng Rangbah Katholik ha Mawpat

Shillong, Risaw, 12: Ka jingïalang ba nyngkong eh jong ka Synjuk ki Seng Rangbah Katholik-Zone 8 ka la long ha Parish Mawpat. Kane ka dei ka sien banyngkong ba ki rangbah bad ki longkpa na ki Parish kiba ha hap ha ka Zone-8 ki la ïashim bynta ha ka lympung ba kyrpang kaba la pynlong hapoh ka jingïalam u Spiritual Director, Rev. Fr. Pascal Lyngdoh.
Ka jingpynkha ïa ka Zone-8 ka dei ka bynta jong ka jingroi ki Parish thymmai hapoh ka Jylla Niam Bah Shillong, kaba long ka sakhi jong ka jingkiew shaphrang jong ka jingngeit bad ka jingïatylli jong ki khun U Blei. Ki Parish kiba don hapoh ka Zone-8 ki kynthup ïa ka Mawpdang (Mary Our Christian), Umpling (St. Rose of Lima), Nongrah (St. Dominic Savio), Nongmensong (Sacred Heart) bad Mawpat (Immaculate Heart of Mary).
Ka Parish Mawpat bad Nongmensong ki la mih noh na ka Zone-II kaba dei ka bynta jong ka Pynthorumkhrah Parish mynshuwa, hynrei hadien ba ki la ïoh la ka jong ka Parish la pynhap noh ïa ki hapoh ka Zone 8.
Ha kane ka jingïalang, ka Parish Mawpat ka la long ka nongpdiang banyngkong eh ïa ka lympung jong ka Synjuk Rangbah Katholik Zone 8. Watla ka dei ka sien nyngkong, hynrei ka lympu ng ka la long kaba seisoh, namar ki rangbah bad longkpa ki la pynpaw ïa ka jingsngew shongshit ban ïa treilang ha ka kam ïalap, ha ka kam isynei bad ha ka jingïatylli ban pynkhlaiñ ïa ka longiing longsem, katkum ka jingong u Parish Priest ka Mawpat Parish, u Lyngdoh Sohblei Roibok Buïam.
Ka lympung kaba la sdang ha ka sngi Saitjaiñ bad ba la pynkut ha ka sngi u Blei hapoh ha ka jingïalam jong u President Rangbah u Bah Dimarson Marbaniang bad u General Secretary Bah H. Kharlyngdoh, ki rangbah na ki san tylli ki Parish ki la ïashim bynta ha ka Mass Bakhuid ha kaba u Chancellor jong ka Shillong Archdiocese u Fr . Jameris Shylla, u long u kongsan ryngkat ka jingsynran lang jong u Parish Priest ka Mawpat Parish, Fr. Roibok Buïam, u Spiritual Director Fr. Pascal Lyngdoh bad kiwei ki Lyngdoh Sohblei.
U Fr. Jameris Shylla u la ai khublei kyrpang ïa ki rangbah jong ka Zone-8 bad u la khot ïa ki ban long ki nongbud ba skhem jong U Jisu Khrist, ban pynpaw lyngba ka jingim bad ka kam jong ki ïa ka jingieit bad ka jingim kaba pynim. U la pynkynmaw ruh ba ki rangbah ne ki longkpa ki dei ki nongïalam bad ki nongpynkhlaiñ ïa ka imlang sahlang, ki nongpynïaid ïa ka balang bad ki nongpynneh pynsah ïa ka jingngeit Blei.
La pynkut ïa kane ka sngi da ka jingmane Sakrament ba la pynïaid da u Fr. Pascal Lyngdoh bad ïa ka jingïalap na ka Ktien u Blei da u Bah Stanley Bareh.
La pynbud da ka prokram lehkmen ryngkat ka jingai khusnam nongjop ïa ki jingïalehkai bapher bapher ba la pynïaid da ka Zone.
Ka lympung ka la kut da ka jingpynhiar lama da u Fr. Pascal Lyngdoh bad u Bah A.L. Hek kaba pynpaw ba ka jingïalang nyngkong jong ka Zone 8 ka la long kaba jop bad kaba pynshong nongrim ha ka jingïatylli bad ka jingtreilang jong ki rangbah bad ki longkpa ha ka jingim Khristan bad ka jingim ha ka imlang sahlang.