Ban pynkhlaiñ ki lad jingtip pynlait ka MSIC ïa ar tylli ki kot

0

Shillong, Risaw 11: Ka Meghalaya State Information Commission (MSIC) ka la pynlait ïa 2 tylli ki kot kiba ai ki lad jingtip kiba thmu ban pynkhlaiñ ïa ki jingai jingtip bad ka jingsngewthuh halor ka Right to Information (RTI) hapdeng ki bor sorkar bad kumjuh ruh ki nongshong shnong.
Ha kane ka prokram ka Kong R V Suchiang, Chief Information Commissioner bad ka Kong Ripnar Lyngdoh, Information Commissioner, ki la pynlait ïa kine ki kot lyngkdop kiba ai kyrteng, “Duties and Responsibilities of Public Information Officer (PIO)” bad “Duties and Responsibilities of the First Appellate Authority (FAA)” ha ka jingïalang kaba ka pynlong ha office jong ka Meghalaya State Information Commission.
Haba kren ha kane ka sngi ka Kong R V Suchiang ka la ïathuh ba ïa kine ki kot la pynwandur ban ai ki lad ïalam bad kdew lynti na ka bynta ki ophisar bad ïa ki paidbah ban pynthikna ïa ka jingpyntreikam bha ka RTI Act, 2005. Ka la banjur ïa ka jingdonkam ban sngewthuh ïa ki kam jong ki PIO bad ki FAA kiba lah ban nohsynniang sha ki kam kiba khuid ba suba, nangta ki jingkheiñ kiba biang bad ka synshar khaddar kaba bha.
Katba ka Kong Ripnar Lyngdoh ka la kdew ba ka jingpynmih ïa kine ki kot ki la pynsuk ïa ki rukom treikam jong ka RTI, kaba ai lad ïa ki ophsiar na baroh ki kyrdan jong ki tnat sorkar bad kumjuh ruh ki nongshong shnong kiba wad ïa ki lad jingtip.
Ïa kine ki booklet yn sa sam sha baroh ki tnat sorkar, ki bor sorkar bad sha ki nongshong shnong, bad lah ruh ban ïoh lyngba ka website jong ka Meghalaya State Information Commission.

Leave A Reply

Your email address will not be published.