Sei ka AMKA 108 ngut ki nongïalehkai ban ïakhun ha ka NE Zone Karate C’ship 2025 ha Arunachal

Shillong, Risaw 10: Ka All Meghalaya Karate-Do Association (AMKA) ka la phah haduh 108 ngut ki nongïalehkai Karate ki ban ïa shim bynta ha ka 4th North East Zone Karate Championship 2025 ka ban long ha Arunachal Pradesh.
Kane ka Championship kan long ar sngi lynter, ka ban sdang naduh mynta ka sngi Saitjaiñ, 11 tarik Risaw, bad kan kut ha ka 12 tarik Risaw, ha Itanagar.
Ki kyrdan ba ki nongïalehkai karate ka Meghalaya kin shim bynta ka dei naduh ki sub-junior haduh ki cadet, junior, U-21 bad haduh ka kyrdan senior. La synran lang ïa ka kynhun ïalehkai jong ka jylla ryngkat bad 7 ngut ki Team official bad 8 ngut ki Technical official.
Ki nongjop na kane ka championship kin shah jied ha ka thup lyngkot ban ïashim bynta ha ka lympung ïalehkai kaba la tip da ka KIO (Karate India Organisation) All India Inter Zone Karate Championship 2025, ka ban long ha Goa ha u bnai Nohprah.