Jowai, Risaw 10: Ka West Jaiñtia District Sports Association (WJDSA), Jowai ka la ïoh ban sdang ïa ka sienjam kaba nyngkong jong ka lympung phutbol ki kynthei kaba la tip kum ka “1st Women League Football Tournament 2025” ha ka 10 tarik u Risaw, ha madan Kiang Nangbah Stadium Dongmihsngi Jowai.
Katkum ka prokram ki nongpynïaid ki la thmu ban pyndep lai tylli ki jingïalehkai ha kane ka sngi hynrei la hap ban pynkynriah noh ïa ka jingïakhun kaba ar hapdeng ka Catholic Youth SC bad ka Ladthadlaboh SC namar ka jingjur palat u slap. Hynrei watla katta ruh, ka sngi sdang ka la sakhi ïa ka jingjop kaba shyrkhei ha ki ar tylli ki jingïalehkai kumjuh ruh ïa ka hat trik jong ka Nidaroiki Biam.
Haba phai sha ka jingïalehkai kaba nyngkong, ka Nidaroiki Biam (12, 16 & 41) ka la pynkhihjar lai sien ban ai mynsiem ïa ka 7-Wasa United ba kan jop suk da 7-0 kol ïa ka Sabahmuswang. Katba ka Phyrnai Phawa (13 & 29) bad ka Amethis R Darnei (50 & 55) ki la noh synñiang da kaba thep mar ar kol.
Kumba la kdew haneng, ka jingïakhun kaba ar hapdeng ka Catholic Youth SC bad ka Ladthadlaboh SC la hap ban pynsangeh noh naka daw u slap.
Ha ka jingïakhun kaba lai ka Carpe-Dien FC kala pynjemkhnap haduh 12-0 kol ïa ka Q.C.S Women FC. Ki kol na ka bynta ka Carpe-Dien FC la thep da ka Peacefull Pohplet (3’), ka Daphi Dkhar (9’), ka Baiarbha Nongrum (15 & 60), ka Deigracia Dan (25), ka Elizabeth Thianglai (29’), ka Ibanetilut Shylla (39 & 57), ka Glorify Lakiang (43), ka Saphika Pyrtuh (52 & 54) bad ka Wailutmitre Pohleng (own goal) haka minit ba 18.
Kane ka lympung kan wanphai biang ha ka 17 tarik Risaw ryngkat bad lai tylli ki jingïakhun, ka Spahmariang SC pyrshah ïaka Sabahmuswang SC haka por 11 baje mynstep, ka 7-Wasa United pyrshah ïaka Catholic Youth SC haka por 12 shiteng nohphai sngi, Katba ka Ladthadlaboh SC pyrshah ïaka Carpe-Dien FC haka por 2 baje nohphai sngi.
