Jowai, Risaw 10: Ka resol ki jingïalehkai jong ka lympung phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills, kaba la long ha ka sngi Thohdieng, 10 tarik u Risaw ha madan Wahiajer Multi-Sports Complex.
Haba phai sha ka jingïakhun ba nyngkong hapdeng ka Ummulong bad ka Namdong-B kila poi sha ka jingïakhaid hadien ba baroh arliang ki la thep mar 1-1 kol. ïa ki kol na ka Ummulong SC la thep da u Lamphrang Dkhar haka minit ba 13, na ka liang ka Namdong-B la thep da u Dramos Phawa.
Haba phai pat sha ka jingïakhun kaba ar, la ïohi ïa ka Friends United kaba la pynliem noh da 2-1 kol ïaka Malngiang SC. ïa kitei ki kol na ka Friends United la thep marwei da u Daochwa Dkhar haka minit ba 27 & 76. Katba ïa ka shikol na ka bynta ka Malngiang SC la ïoh ban thep da u Nibiang Phawa haka minit ba 47.
La pyntip ba ka jingïalehkai jong ka First Division 2025 ha kane ka 11 tarik Risaw kan sdang haka por 12 shiteng mynsngi hapdeng ka Tyrchang SC pyrshah ïaka Lumsharatoh SC. Katba haka por 2 baje shiteng nohphai sngi ka Maya SC pyrshah ïaka Dongmihsngi SC.
