Shillong, Risaw, 07: Haduh 212 ki mukotduma ba la phah da ki Iingbishar bapher bapher ha ka por ba la pynlong ïa ka jingpynïasuk, 21 tylli ki mukotduma la lah ban pynïasuk.
Ki mukotduma ba la pynïasuk ki kynthup ïa ki jingïakynad ha ka shongkha shongman, ki mukotduma ka jingshah thombor ha ïing ha sem, ki mukotduma ba la thep pisa da ki Cheque bym don pisa, ki kam shakri, kiwei kiwei ki mukotduma.
Ïa kane ka sienjam la pynlong da ka Meghalaya State Legal Services Authority da ka jingïatreilang bad ka High Court Legal Services Committee bad ka District Legal Services Authorities kum shi bynta ka ‘Mediation for the Nation’ ba la pynlong ha ka ri baroh kawei da ka National Legal Services Authority (NALSA), ha ryngkat ka jingïatreilang bad ka Mediation and Conciliation Project Committee (MCPC), ka Supreme Court of India.
La pynlong ïa ka ‘intensive drive’ kaba 90 sngi ban pynbeit ïa ki mukotduma kiba dang sahteng ha baroh ki Sub-Divisional Court, District Court bad ha ki High Court kynthup ïa ki District Council ha Meghalaya lyngba ka ‘Mediation’ hapoh ka jingpynïaid jong u Justice HS Thangkhiew, Chief Justice (Acting) Iingbishar Meghalaya High Court bad Executive Chairman, MSLSA bad Chairman, HCMC Justice W. Diengdoh, Judge, High Court Meghalaya bad Chairman, HCLSC.
