Jowai, Risaw, 07: Da ki hajar ngut ki paidriewngeit na ki Parish ka Jowai Diocese bad kiwei kiwei ki la tuid sha ka jingleh burom ba khadduh ïa ka met ba dang sah jong u Rev. Fr. Hilarius Lamare, u Parish Priest bad Vicar General ka Diocese Jowai ha St. Teresa’s Parish, Jowai hashwa ban rah ontep ïa ka met sha u lum jingtep ka Balang Katholik, Jowai.
ïa ka jinglehñiam la pyndep da u Bishop ka Jylla Niam Jowai u Most Rev. Ferdinand Dkhar ryngkat ka jingdonlang jong u Bishop ka Jylla Niam Nongstoin u Most Rev. Wilbert Marweiñ, ki Lyngdoh Sohblei na ki Parish bapher bapher, ki riewsaiñ hima sima bad ki khynnah skul.
Kum ban shu pynkynmaw, u Rev. Fr. Hilarius u la kem pang ha ka 18 tarik, Jylliew 2025 bad la pynkit sha Woodland Hospital, Sabah muswang. Hadien kane, la pynkit noh Nazareth Hospital, Shillong bad la pynthiah hapoh ICU tad haduh ka sngi ba un da khlad noh na kane ka sla pyrthei ha ka 5 tarik mynta u bnai.
U Rev. Fr Hilarius u la long teng u Diocesan Administrator ka Jylla Niam Jowai hadien ka jingkhlad kyndit u Bishop ka Jowai Diocese u Rt. Rev. Vincent Kympat uba long u Bishop uba nyngkong eh ka Jowai Diocese ban pynïaid ïa ki kam jong ka Balang katba ym pat thung ïa u Bishop thymmai.
U Rev. Fr. Hilarius u la shimti kum u Diocesan Admnistrator ha ka 10 tarik, Nailar 2011 bad u la neh ha ka kam tad haduh u Ïaiong, 2014.
Hadien ka jingshimti jng u Archbishop ba la shongthait ka Guwahati Archdiocese u Most. Rev. Thomas Menamparampil SDB, DD kum u Apostolic Administrator ka Jowai Diocese ïa u Rev. Phadar Hilarius Lamare la thung kum u Parish Priest jong ka Parish Jowai bad u la shimti ïa ka kam ha ka 24 tarik, Kyllalyngkot, 2015 bad ha kajuh ka por u bat ïa ka kam kum u Vicar General ka Jowai Diocese.
U long u Parish Priest jong ka Parish Jowai tad haduh ka sngi ba un da khlad ha Nazareth Hospital Shillong.
U la long u Lyngdoh Sohblei la sawphew ar snem bad shakri ha kiba bun ki Parish ha Jyllaniambah Shillong bad ha Jylla Niam Jowai.
