Mynta u bnai ne ha u bnai ban wan lah ban pynbna noh ïa ka result kam Pulit: Chairman CRB

Shillong, Risaw 07: U Inspector General of Police (SB/Bdr) cum Chairman of Central Recruitment Board (CRB) u Dalton P Marak u la pyntip ba ka result na ka jingthungkam ha ka kam pulit ha ka jylla la khmih lynti ban pynbna noh hapoh une u bnai ne ha u bnai ban wan.
“Ka kyrdan kaba khatduh jong ka jingpynkhreh ban pynbna ïa ka result ka la dang ïaid,” ïathuh u Marak sha ki lad pathai khubor ha ka sngi baar hadien ka jingïalang bad kiba ïakhun ïa kane ka kam pulit.
“Kam long kaba lah ban ai ïaphi ïa ka tarik kaba thikna hynrei kyrmen ba hapoh une u bnai ne ha u bnai ban wan ngi dei ban lah ban pynbna noh ïa ki result bad ban sdang noh ïa ka interview na ka bynta ban jied ïa ki kyrtong,” u la ong.
Ki la don kumba 54,000 ngut kiba ïakhun ïa ka written test, bad ka jingkheiñ bad jingpynbiang ïa ki mark kumba long mynta ka dang ïaid shakhmat.
“Nga la dep ban batai ïa ki ba lyngba kane ka jingpynrungkam ngi la ïohpdiang haduh 1.72 lak tylli ki application ha kaba na kine kumba 1.28 lak ngut ki la shim bynta ha ka physical efficiency test (PET) bad ha kaba khatduh kumba 58,000 ngut ki kyrtong ne kiba ïakhun ïa kane ka test ki la long kiba bit. Ha kawei ka liang baroh ka la long kumba 54,000 ki kyrtong ki la ïakhun ïa ka written test. Kumba long mynta ka kompeni kaba don bynta ban pynlong ïa ka written test bad ïa baroh ka kam thungkam, ki dang pynkhreh ïa ki result sheet. Ki dei ruh kiba don bynta ban pynkhreh ïa ka jingkheiñ kaba bun bha kaba long na ka bynta ki 54,000 hajar ngut kiba ïakhun, kynthup ïa ki OMR sheet ha kaba la ai ïa ki jubab,” ong u Marak.
“Kiba ïakhun ki kwah ban tip ïa baroh kine bad kumta ngi la dep ban batai ïa ki bad ki la pynpaw ba ki la sngewhun bad kane ka jingbatai. Lada mano mano ki don ban kylli ne ki artatien haba ïadei bad kane ka rukom pynrung kam ki long kiba la pdiang sngewbha ban wan sha ka ophis CRB ne ban kynduh ïa nga ha police headquarters,” u la bynrap.
U Chairman ka CRB u la ong ba ka rukom pynïaid kam ka long haba shit haba shai, haba la pynmih ruh ïa ki jubab na ka bynta ki kyrtong ba kin kheiñ ïa ki marks jong ki.
Katkum ka jingong jong u, ki la don kumba 3 copy ki OMR sheet – ka copy kaba nyngkong ka don bad ka company na ka bynta ban kheiñ ïa ki marks jong ka written test, kaba ar pat la buh bad ka CRB bad kaba lai ka don bad ki kyrtong.
“Ki kyrtong ki lah ruh ban ïanujor bad ban peit katno ki ïoh marks ha ka written test. Ki la dep lypa ïa ki marks jong ka PET bad ki lah ruh ban kheiñ ïa la ki jong ki written test ban nujor bad ki jubab ba la pynmih, kumta kin lah ban tip haduh katno kin score ha kine ki test,” u la ong.