Nongpoh, Risaw 07: Ki nongïalam ka RBYF Birnihat Circle mynta ka sngi ki la pynkup burom ïa u Bah Sosthenes Sohtun u ba dei u President barim katei ka Circle bad u ba la long mynta kum u MLA, MDC ka Jirang Constituency bad kumjuh ruh u ba la shah jied ban long kum u myntri sorkar dang shen.
Ïa kane ka prorkam pynkup burom la pynlong ha Byrnihat ha ka jingdonlang ki nongïalam ka RBYF Byrnihat Circle naduh u Bah Ricky Lapang, President RBYF Byrnihat Circle, u Samla Franky Rani, Vice-President bad kiwei kiwei ryngkat ka jingsynran lang ki nongïalam sengkmie naduh u Bah Liander Nongshli, Working President, Bah Wanpher S. Wahlang, Publicity Secretary, u Bah Neversad Makdoh, Sports Secretary, ki nongïalam Shnong lem bad kiwei kiwei.
Na ka liang ki nongïalam ka seng haba kren ha katei ka sngi ki la pynpaw ka jingsngewkmen ba khraw ba uwei na ki dkhot na ka iing jong ka RBYF u la poi shaduh ka kyrdan myntri sorkar ha ka jylla kaba long ka jingsarong kaba khraw ïa ka seng bad ka dong Ri-Bhoi baroh kawei bad kane baroh ka dei namar ka jingsngewrit jong u ban shakri ïa ki paidbah naduh ka por ba u dang don ha ka RBYF haduh ba un da long nongmihkhmat bad mynta ka kynti kum u myntri sorkar.
U Bah Sosthenes Sohtun kum u nongïalam barim ka RBYF Byrnihat Circle bad mynta kum u myntri sorkar u la pynpaw ka jingsngewnguh ïa ka seng kaba la kynmaw burom ïa u namar u dei u nongïalam ha katei ka circle haki snem 2009 haduh 2012 dakaba pynpaw ruh ba u poi shaduh katei ka kyrdan dei namar ka jingkyrshan bad ai mynsiem na ka por sha ka por da ki para nongïalam.
U Bah Sosthenes u la kyntu ruh ïa ki dkhot ka RBYF ba ki dei ban bat 3 tylli ki nongrim kata ban long kiba tylli, kiba shlur bad kiba don ka akor ka burom, namar haba ki shakri ki dei ban don ka jingmynsiem kaba rhem ban shakri hok na ka bynta ka daw bah jong ka jaitbynriew.
