Phah ka MAA 12 ngut ki nongïalehkai ban aireng sha Odisha ha ka National Junior Athletics Ch’ship
Shillong, Risaw 07 : Ka Meghalaya Athletics Association, ka la pynlong ïa ka prokram kitbok ïa ki 12 ngut ki nongïalehkai ka jylla ba kynthup ïa ki lai ngut ki shynrang bad 9 ngut ki kynthei ban mihkhmat ïa ka jylla sha ka 40th National Junior Athletics Championship 2025 kaba la buh ban long ha Bhubaneshwar, Odisha naduh ka 10 – 14 tarik Risaw mynta u snem.
Katkum ka kyrwoh la ong ba ïa kine ki nongïalehkai la jied katkum ka jinglah bad ka jingtbit jong ki na ka lympung ïakhun jong ka East Zone Junior Athletics Championship kaba long ha Ranchi, Jharkhand 2025.
La ong ruh ba dei tang kito ki nongïalehkai kiba la kot ïa ka thong ba la buh kiba lah ban aireng ha katei ka lympung.
Kane ka kynhun ka kynthup ïa – Pleasantly Synnah ba dei Head Coach & Manager, Amin Kharkongor kum i Coach bad Shreya Thapa kum Physio.
Kiba bun na kine ki nongïalehkai ki dei ruh kiba khur takma ha ka lympung ïalehkai jong ka East Zone Champion bad kumta na ka liang ka Synjuk ki khmih lynti ba kin ïoh ban khur katto katne tylli ki takma na katei ka lympung National Junior mynta ka kynti.
Ha kane ka jingleit kitbok ïa ki nongïalehkai shwa ba kin mih na ka jylla la donlang naduh u Bah Patrick Lamare, Joint Secretary, Meghalaya Athletics Association kum u Special Guest, nangta u Dipshon Rynthathiang, Vice President, Meghalaya Athletics Association, Kong Daisy Marweiñ, Sr. Joint Secretary, Meghalaya Athletics Association bad kiwei kiwei.
Kane ka long katkum ka kyrwoh ba la phah da u Bah Pleasantly Synnah, Jt. Secretary jong ka Meghalaya Athletics Association.
Ki nongïalehkai ki kynthup ïa –
Renaldi Dhar (100m & LJ U-20 Boys),
Henry Yoga A Sangma (100m & 200m U-18Boys),
Highbornson Muksor (60m U-16 Boys),
Enriyana G. Momin (60m & LJ U-16 Girls),
Rukini RT Dkhar (600m U-16 Girls),
Turoi Phawa (60m & LJ U-16 Girls),
Tusume Marak (JT & LJ U-16 Girls),
Ibapalei Shyrkon (HJ U-16Girls),
Sibilda Maring (HJ U-18 Girls),
Anrisha Klein (HJ U-20 Girls),
Balasiewdor Pathaw (3000m U-20 Girls),
Damika R Lyngdoh (200m U-20 Girls).