Shillong, Risaw 07 : Kum shi bynta ka jingrakhe ïa ka Wildlife Week -2025, na ka liang ka Wildlife Wing jong ka tnad Forest and Environment Department ka la pynlong da ka jingïakob mareh ba tip kum ka “Run for Wildlife” ha nongbah Shillong ha ka 04tarik mynta u bnai.
Ha kane ka lympung la sakhi ba ki la poi baroh haduh kumba 600 ngut ei ei ki nongwan shim bynta ha ki kyrdan mareh bapher bapher la ka long naduh kito kiba 10 – 18 snem, nangta kiba la rangbah naduh 19-40 snem, ki ba la kham san naduh ka rta 41 – 55 snem bad kumjuh kito kiba la noh ka rta kiba naduh 56 snem shaneng.
La sakhi lang ruh ka jingshim bynta lang jong ki nongmareh kiba la paw nam ha ka jylla, nangta ki khynnah skul ki nongtrei ka tnad Forest nalor ki nongmareh kiba ju smat ban shu wan mareh kai bad kaba kham pynshongshit ka dei da ka jingbun bha ki samla kynthei bad ki longkmie kiba wan shim bynta shitrhem.
Ïa kane ka jingïamareh la sdang na Forest Management Building kaba don ha Lower Lachumiere da u Principal Chief Conservator of Forests & Chief Wildlife Warden u Harish Chandra Chaudhary, ha ka jingïadon lang u P.K. Agrahari, Chief Conservator of Forest bad kiwei kiwei ki heh ophisar jong ka khlaw. Hadien ba ki la dep ban mareh ïa ka jingjngai bapher bapher kynthup ïa kiba mareh ha ka thup ba 5 km, 7 km bad 10 km kaba long katkum ka rta, la pynkut noh ïa ka prokram ha ka jaka kaba la sdang kata ha Forest Management Building.
Ka jingthmu jong kane ka prokram ka long ban pynsngewthuh ïa ki paidbah shaphang ka jingriewspah jong ka jylla ha ka jingdon ïa ki syntiew ki skud ka jingdonkam ban sumar bad pynheh ïa ki mrad ki mreng, ka jingma na ka jingpynjulor ïa ki jaka sah jong ki jingim ba harukom bad khamtam ka jingtyngkhuh hapdeng ki mrad khlaw bad ki briew.
Nalorkata, la kdew ruh ba katei ka prokram ka long ruh ban wanrah ïa ka met kaba koit ba khiah bad kaba shait ba khlain ïa baroh kito kiba wan ban shim bynta.
