Kiba shong ha Bolero sorkar ki dang mut leit shaw ïa ki ophisar jong ki
La pynkit ïaka met ki 2 ngut sha Garo Hills
Nongpoh, Risaw 06: Ka jingjia aksiden kaba shyrkhei kaba la jia hynnin ka janmiet sngi u Blei, ka la wanrah ka jingkthang mynsiem ïa ki bahaiing bad kumjuh ruh ka tnad sports ha kaba 2 ngut ki mynsiem kila duh noh hashen tang namar ka jingñiah thurmur jong u nongñiah trok u ba la don hapdeng ka jingbuaid kyiad.
Lah ruh ban pynkynmaw ba kane ka jingjia kala jia haka janmiet sngi u Blei ka 5 tarik Risaw, katba kitei ki rangbah ki dang thmu ban leit shaw ïa la ki ophisar ba kynthup ïa ka kong Linza Fenny Syiem na Nongbah Shillong kaba dei ka District Sports Officer ka Resulbelpara, bad u Bah V Kharbuki District Agriculture Officer, Resulbelpara hynrei ki la mad pynban ïa katei ka jingjia ba sngewsih haka shnong Umsaw Nongkharai hadien ba kawei ka trok kala jam na shilliang sha shilliang surok ban rat syndon ïa katei Bolero.
Napdeng kitei ki 2 ngut kiba khlad hashen kiba don ruh haka kam, u Sanbirth M Momin u dei u nongñiah kali jong ka ophis ka District Sports Officer, Resubelpara bad u Smarth Sangma u dei u nongñiah kali jong ka ophis u District Agriculture Officer, Resulbelpara katba uwei pat u ba la mynsaw ha katei ka jingjia u Nikash M Momin u dei hynmen jong u Sanbirth M Momin u ba la synran lang bad ki.
Related Posts
Ïa ka met jong kitei ki 2 ngut ki nongñiah kali kiba la khlad ha katei ka jingjia la pynkit noh mynta ka sngi sha North Garo Hills hapdeng ka jingjaw ummat bad wan shaw da ki bahaiing hasem hadien bala pyndep ïaka Post Mortem bad ban pyndep ïaka jinglehniam ba khatduh.
Ha kaba ïadei bad kane ka jingjia naka liang ka ophis u District Sports Officer Ri-Bhoi District kila pynpaw ka jingsngewsih halor kane ka jingjia ba khlem poi pyrkhat, bad phah ruh ka khubor sngewlem sha ka iing ka sem.
Shuh shuh naka liang u Dr. Mukul Sangma, MLA ka Ampati u la pynpaw ka jingsngewsih bad pynrem jur ïa katei ka jingjia kaba dei tang naka kadaw ka jingleh thurmur utei u nongñiah trok u ba la don hapdeng ka jingbuaid kyiad kaba la pynlong ïa kitei ki 2 ngut ban duh noh syndon ïala ka jingim.
U Mukul u la pynpaw ruh ka jingsngewkhia halor ka jingjur ki aksiden ha surok bah National Highway bad ka jingthurmur ki nongñiah kali ki bym burom ïaki aiñ ñiah kali kaba ju wanrah ïaki jingjia ba sngewsih bad ka jingduh noh ki mynsiem briew.