Shillong, Jylliew, 30: U Director General of Police (DGP) u Dr. Lajja Ram Bishnoi ha ka sngi Palei u la pynbna thma pyrshah ïa ka jingkhaii drok ha Meghalaya hadien ka jingïohkem ïa ki hynriew ngut ki snar khaïi ryngkat bad 676 gram u drok uba shongdor T. 1 klur na East Jaiïtia Hills bad na East Khasi Hills District.
“Ka thma pyrshah ïa u drok kan dang ïai bteng bad ki Pulit ka Meghalaya ki la buh hakhmat ïa ka thong ban rat dyngkhong ïa ka jingjyllei jong u drok napoh ka jylla. Ïa mynta ka jingkhynra ka dang ïai bteng ha baroh ki lynti ba ju shalan ïa u drok tad haduh ba ynda lah ban rat dyngkhong ïa u drok na kane ka jylla,” ong Director General of Police ka Jylla u Dr. LR Bishnoi ha ka jingïakren bad ki lad pathai khubor.
Ki snar khaïi drok kiba la shah kem ha ka jingpynap shrip jong ki Pulit ki long u Garry Kharnaior 30 snem ka rta na Mawlai Bus Stand bad u Kmenlang Shabong, 20 snem ka rta na Mawlai Mawdatbaki kiba la shah kem na ka Bos Jaganath travels and Tours Bus kaba don ïa u nombar ML05-L 7887 ha ka por kumba 3: 50 baje mynstep ha Khliehriat, East Jaiñtia Hills ka sngi Palei.
Na ka met jong ki, la ïoh kurup ar tylli ki pla ba la thep ïa ki 60 tylli ki jingthep sabon ba la song ha ka pla plastik rong iong bad 30 tylli ki dawai kuli Nitrasepam.
Shuh shuh, ha ka jingtohkit, kine kiba la shah suba nongkhaii drok ki la phla ba u don sa uwei pat uba la tip kyrteng kum u Marvin Jyrwa uba dei u nongbei pisa na ka bynta ban wanrah ïa kine ki jingdih pynbuaid ba long be-aiñ bad uba dang ap khmihlynti ban ïoh pdiang ïa kine ki song ha Mawryngkneng.
Marmar, ka kynhun ki Pulit Anti Narcotic Task Force (ANTF) ka East Khasi Hills ki la leit sha Mawryngkneng bad ha ka jingpynap shrip ki la ïohkem ïa u Marvin Jyrwa bad lai ngut ki paralok kiba la tip kyrteng kum u Meibifil Buam, 22 snem ka rta na Mawlai Umsaw, u Khrawboklang Kharkongor, 29snem ka rta na Mawlai Kyntonmasar bad u Aiborlang Laitmon 28 snem ka rta na Mawlai Nongpathaw.
U DGP u la ïathuh ba la pynngat kyndon hapoh ka NDPS Act bad ka jingtohkit ka dang ïaid shakhmat.
Haba kynti ïa ki paidbah ban ïasnohkti lang ha ka jingïakhun thma da ka tnat Pulit pyrshah ïa ka jingkhaii drok, u Dr. Bishnoi u la ong, “nga kyrpad ïa ki shnong bapher bapher ba kin wan shakhmat ban ïasam jingtip sha ki Pulit bad ngin sa buhrieh kyrpang ïa ki kyrteng jong ki nongpyntip bad ngin pynthikna ba ngin pyndep noh mardor ïa ka kam tang shu ïoh jingtip.”
U DGP ula pynkup burom ïa u Additional SP u Banraplang Jyrwa bad ïa ki 35 ngut kiwei pat ki Pulit kiba la don bynta ha ka jingkhynra kaba la long kaba jop da ka jingïohkem ïa u snar nongkhaii. Ïa kine ki Pulit la ai ruh da ki syrnot halor ka jingpyndep hok ïa la ka kamram.
“Ka jingkhynra ka dang bteng. Kumba ka long ka rukom, ngi la rai ba kino kino ki Pulit kiba trei hok lane na ka tnat syntiat, kin ïoh ïa ka jingshah pynkup burom,” u la ong.
Shuh shuh u DGP u la pynbna ïa ka rai ba la shim da ka tnat Pulit ban pynmih noh da ki Mobile App khnang ban pynjanai ïa ka jingtreikam ka tnat syntiat ki Pulit la kumno kumno hapoh 15 sngi.
“Ngin sa pynmih ïa kane ka App ha u Naitung bad hadien kata ngi khmihlynti ba ngin sa nang ïohlum bun ki jingtip na ki tnat syntiat bad na ki paidbah,” u la ong.
