Kular u Myntri ka koit ka khiah ïa ka KSU ban pynbeit ïa ka bhah pule MBBS ha ka jylla

Shillong, Risaw 6 : U Myntri ka Koit ka Khiah u Ma Wailadmiki Shylla ula kular ïa ka kynhun jong ki samla pule ka Khasi Students’ Union (KSU) ban pynbeit ïa ki jingkynnoh leh bymhok ha ka jingsam ïa ka bhah pule MBBS na ka bhah ka Jylla.

“U Myntri ka Koit ka Khiah ula pdiang ïa ki jingai jingmut ka Seng bad ngi khmih lynti ïa u ban pynbeit noh ïa ka thup. Ngim kwah shuh ban nang ïohi ïa kum kine ki jingleh bymhok ha ki por ban wan” ong u President ka KSU samla Lambokstar Marngar haba ïakren bad ki lad pathai khubor hadien ka jingïalang ha ka sngi Nyngkong.

Ula ong ba ka Seng kala kdew ba ka rukom jied ïa ki samla pule kam don satia ïa ka jingjied kaba shai bad kat kum ka jingïoh marks, ha kaba ki samla pule ba ïoh kham rit ka marks la pynrung ha ka open category katba ki samla pule Khasi ba ïoh bun marks ki la shah kyntait.

“Ngi la sakhi ïa ka jingleh bym hok ha ka jingsam bhah pule manla u snem, wat hapdeng ki jingïai kyrpad jong ngi ban jied haba shit haba shai bad kat kum ka jingïoh marks” ong u samla Lambok haba bynrap “Ka long kaba sngewkhia ba ki samla pule ba ïoh duna marks kila shah pynrung ha ka open category, kaba pynduh lad ïa ki samla pule Khasi kiba dei hok ban ïoh ïa ka bhah pule”.

Ka KSU kala dawa ban weng noh ïa ka clause 9.6 na ka Standard Operating Procedure (SOP), kaba donkam ïa ki samla pule ba kin jied hapdeng ka open category bad ka Scheduled Tribe (ST) category. Ula pynpaw ba kane ka clause ka dei ka bym ïahap satia bad kaba pynduh lad ïa ki samla pule ïa ka hok ba ki dei ban ïoh ha ka open category.

“Ngi la kyntu ïa ka Sorkar Jylla ban pynthikna ia ka jingjied ïa ki samla pule haba shit haba shai, haba ban jur ba ki samla pule ba ïoh bun marks, ki dei ban ïoh nyngkong shuwa” ula ong.

U samla Lambok ula pyntip ba ka KSU kala buh jingkylli ruh halor ka jingpynrung lang ïa ka Scheduled Caste ha ka State Reservation Policy, haba dawa ïa ki sakhi ba pynrung lang ïa ki.

“Ka Sorkar kala pyrshang ban pynksan ïa ka jingpynrung lang ïa ki Scheduled Caste ha ka Reservation Policy, hynrei ngi donkam ïa ka sakhi kaba khlaiñ ban kyrshan ïa kane ka jingkam, namar ym don ba tip ïa kane. Ngin sa peit thuh ïa kaei ka jubab bad ngin sa shim rai ïa kaei kaba ngi dei ban leh shakhmat” ula ong.

U General Secretary ka KSU samla Donald V Thabah ula ong ba ka Seng kala dawa phra ngut ki samla pule Khasi kiba ïoh bun marks ban ïa ka Tanushka Chakravarty, ki dei ban rung lang ha ka waiting list jong ka open category.

U samla Donald ula ong ba ka Clause 9.6 ka dei kaba pynkynrum kynram bha namar ka pynbor ïa ki samla pule ba kin jied hapdeng ka jinglong ST bad ka open category, kaba lah ban pynduh noh ïa ka hok jong ki.