Shillong, Jylliew, 30: Arngut ki runar kiba donkti ha ka kam leh be-ijot ki la shah rai pynrem ha ka Iingbishar da kaba shah set along ryngkat bad ka jingshah dain kuna.
Ha ka 18 tarik, Naiwieng, 2016, ka la don ka jingujor ejahar ha Amlarem Police Station ba kawei ka kynthei ka la shah leh be-ijot ha ka 17 tarik Naiwieng, 2016 ha u briew uba la tip kyrteng kum u Murtibiang Surong. Ïa ka case la rejistar ha Amlarem PS hapoh ka kyndon 376 jong ka Indian Penal Code bad la bynshet ha ka Sub Inspector O. Tyngkan jong ka Women Police Station ban pynlong ïa ka jingtohkit bad la pyngngat kyndon ruh halor kane ka jingjia, ong u kyrwoh ba la phah da u Superintendent of Police ka West Jaiñtia Hills.
Ka Kashari jong u District Session Judge, West Jaiñtia Hills, ha ka 30 tarik, Jylliew, 2022 ka la lap ba u Murtibiang Surong u la leh ïa kane ka kam runar bad la rai pynrem ïa u katkum ka kyndon 376 jong ka Indian Penal Code da kaba set along 12 snem ryngkat bad ka jingdaiñ kuna T. 50,000 hajar.
Ha kawei pat ka jingjia, ha ka 27 tarik, Rymphang, 2018, la mudui ejahar ha Jowai Police Station hadien ba kawei ka khynnah rit ka la shah leh be-ijot naduh u Naiwieng, 2017 ha u Francis Suchiang. Ïa ka Case la rejistar ha Jowai Police Station hapoh ka kyndon 506 Indian Penal Code (IPC) bad hapoh ka Section 7/8 jong ka POCSO Act bad la bynshet ha ka Sub Inspector R.M.Suchiang jong ka Women Police Station ban tohkit bad pyngngat kyndon halor kane ka jingjia.
Ka Kashari jong u Special Judge(POCSO Act),West Jaintia Hills ha ka 28 tarik u Jylliew, 2022 ka la lap ba u ba u nongshah mudui u Francis Suchiang u la donkti ha kane ka kam runar bad rai pynrem ïa u da kaba set along hapoh ka Section 8 jong ka POCSO Act na ka bynta saw snem bad ka jingdaiñ kuna kaba T. 6000 hajar bad lada um lah ban siew ïa kane ka kuna un hap ban bteng ïa ka jingshah set along sa ar bnai bad hapoh ka Section 506 jong ka Indian Penal Code (IPC) un ngat ha ka jingshah daiñ kuna kaba T. 2000 bad lada um lah ban siew ïa kane ka kuna un hap ban bteng ïa ka jingshah set along sa shi bnai.
