Shillong, Risaw 06: Ka Khasi Students Union Shillong Mihngi Circle hapoh ka jingïalam jong ka Farmers and Consumers Protection Cell C.E.C ha ka sngi Nyngkong ka lah leit khang ïa kawei ka dukan dawai kaba kyrteng ANSHU MEDICAL kaba dei jong u bar jylla Anup Dey kaba don ha polo.
Ka jingleit khang jong ka seng ha kane ka sngi ïa kane ka dukan ka long namar ka jingbym ?on laisen jong kawei ka Dr (BAMS) Ayurvedic kaba ai dawai ha katei ka dukan dawai bad ba dei ka khynnah pule na NEIAH, ha kaba kam shym pat don ka license ban practice hynrei tang lyngba ka provisional bad ki internship ba dang dep tang shiteng por ka lah trei bad ai dawai ha katei ka pharmacy mynta lah 3 bnai tam eiei.
Ka jingleh jong kane ka Doctor ka long kaba beaiñ bad ka ba buh jingma ïa ka koit ka khiah jong ki paidbah kiba wan shim dawai na kane ka dukan. Ka seng ka lah maham bad khang shi syndon ïa kaba kam dei ban practice khlem pat don ki kot ki sla, ka license kiba pura lyngba ka jaka pule bad kumjuh ruh na tnad ba dei peit ïa ka koit ka khiah jong ka sorkar jylla.
Ha kajuh ka por ka seng ka lah khang ïa kane ka dukan die dawai kaba khlem shimkhía ban da check bin pa bin ïa ki kot ki sla jong kane ka Doktor.
Ha kine ki sngi ban wan ka seng kan sa leit kynduh bad ki bor pynïaid ïa ka institution ba pyndep katei ka Doctor bad kumjuh ïa tnad ba dei peit ïa ka koit ka khiah jong ka sorkar jylla ba dei ban don da ki kyndon kiba biang khnang ba kum kine ki kam ba ktah ïa ka koit ka khiah kan nym jia shuh nang ne shakhmat.
