Ym donkam soi agreement, ngi hun ïa ka rai ka party ban kylliang shuki Myntri : MLA Khliehriat

Shillong, Risaw 06 : U MLA ka UDP na Khliehriat ba dei ruh u MLA barim ka tnad Revenue and Disaster Management ka sorkar jylla, Bah Kyrmen Shylla ha ka sngi Nyngkong u la ong ba ha ka party kim da donkam ïa ka jingïasoi soskular ne agreement na ka bynta ban ïa kylliang shuki Myntri mar shiteng samoi namar ki hun beit ïa ka rai jong ka party.

Ha ka jingïakren bad ki lad pathai khubor, u Bah Kyrmen Shylla u la ong ba ka party jong ki ka la ïoh arngut ka bhah shuki Myntri ha kane ka sorkar MDA. Hynrei u ong pat ba hadien arsnem shiteng ka la mih ka jingïakren bad ka rai ban don noh ïa ka jingkylliang shuki Myntri ïa kaba ki ruh ki la mynjur.

“Kumta la thung bujli noh da ki arngut kiwei pat ha ka shuki Myntri ha ka jaka jongngi (Bah Kyrmen Shylla bad Bah Paul Lyngdoh). Kane kadei ka rai jong ka party bad ïa kane la rai da kiba bun,” u la ong.

U Bah Kyrmen u la ong ruh ba ha ki hynniew  shiteng u la pyrshang ban trei bun bha na ka bynta ka jylla bad ka imlang sahlang. Hynrei u ong pat ba watla um don shuh ha ka shuki Myntri pynban un ïai bteng ban trei khambha shuh shuh namar u la ïoh kham bun bad kham kylluid ka por bad ki paidbah ka jylla.

“Don ki por ba ngam lah ban don ha ki prokram ba ki khot, haba don kiba ïap bad haba don kino kino ki jingjia. Hynrei mynta pat ngan pyrshang ban don ryngkat bad ki la ka long ha ki kam sngewbha, sngewsih bad ha ki prokram bapher bapher,” u la bynrap shuh shuh.

Kumban shu kdew hangne, ka UDP ka la jied bujli noh da u President ka Party Bah Metbah Lyngdoh bad u Bah Lahkmen Rymbui ban shimti ïa ka shuki Myntri kaba ju bat baroh shi katta da u Bah Kyrmen Shylla bad Bah Paul Lyngdoh.