Shillong, Risaw 06 : U Deputy Commissioner ka West Garo Hills u Vibhor Agarwal ula pynbna ba ki kam ban siew ïa ka tulop ba 12 bnai na ka 43 bnai, kaba sahteng jong ki nongtrei ka GHADC, yn sa pyndep noh hapoh ka 15 tarik Risaw.
U Aggarwal ula pyntip ïa kane ha ka jingïalang hapdeng ka Sub-Committee, ki Nongtrei ka Garo Hills Autonomous District Council (GHADC) bad ki dkhot ka Non-Gazetted Employees Association (NGEA) ba long ha ka sngi Nyngkong.
Ka jingïalang kala ïakren halor ka jingpynkhreh bad ka jingïaid jong ka kam ban siew noh ïa ka tulop ba 12 bnai jong ki nongtrei ka GHADC, kumba la mynjur da ka Kynhun Myntri ka Sorkar.
Ha ka jingïalang, ka Sub Committee kala ai ïa ka jingbatai kaba bniah ïa ka rukom pyllait ïa ka tulop, haba batai ïa ki sienjam kiba la shim ban pynthikna ba ka jingpyllait ïa ka tulop kan dep hapoh ka 15 tarik Risaw.
Related Posts
Ki Ophisar ka GHADC kila pyntip ba ka jingpynkhreh kala ïaid shaid shaid ha kaban shna ïa ka statement siew tulop bad ki jingpynbiang ïa ki kot ki sla ban lah pyllait noh ïa ka pisa.
Haba ai jingkren, u Deputy Committee ula ong ba ka jingthmu jong kane ka jingïalang ka long ban shong bishar kam halor ka jingpynkhreh jong ka GHADC bad ban pynthikna ba ka jingpyllait ïa ka tulop kan long kaba ïaid beit ïaid ryntih.
Ha kajuh ka por, u President ka NGEA u Britein Sangma ula pyntip sha ki lad pathai khubor ba watla ka Seng kam pat hun pura ba ka ïoh tang 12 bnai ka tulop, hynrei kala mynjur ban pdiang pat ïa ka. Hynrei, ula pynshai ba ki nongtrei kim pat mynjur ne ai jingmynjur haba ïadei bad ka jingsiew ïa ka tulop ba tista, kaba la buh ban ai naduh ka 1 tarik Naiwieng da ka Sorkar Jylla, namar kim pat tip shai halor ka tyllong jong ka pisa ne pat ïoh da ka jingthoh.
Ula ong ba ka NGEA kan ïaid kat kum ka rai lang jong ki paidbah ka ri-lum Garo haba ïadei bad ka jingpdiang ïa ka tulop ba man la u bnai, naba kane ka kam kala dei ka kam ba sngewkhia da ki paidbah.