Shillong, Risaw 06: Ka jingdon jong ki longkmie ka jylla Meghalaya kiba shah kem na ka daw ka jingshah suba ba ki la leh ïa ki kam runar ka la long kaba duna bha haba kheiñ ïa kum kine ki jingjia ha baroh kawei ka ri, ong ka kaiphod ka National Crime Records Bureau (NCRB) jong u snem 2023.
Ha Meghalaya, kumba 17 ngut na ki 822 ki briew kiba la shah kem ba ki la leh ïa ki kam runar hapoh ka Indian Penal Code (IPC) ha u snem 2023 ki la long ki longkmie kaba kynthup ruh tang kumba 2 per cent. Ha ka national average, ha kajuh ka por ka long 5 per cent (1,57,739 ngut na ka 30,03,024 ngut).
Shuh shuh ka jylla kaba kham duna shuh kum kine ki jingjia ki dei ka Nagaland kaba 18/924, kaba mut tang 1.94 per cent, ka Arunachal Pradesh 67/1939, tang 3.45 per cent, ka Sikkim 9/373, ka long 2.41 per cent, ka Tripura 80/2831, ka long 2.82 per cent bad ka jylla Assam 574 ngut na ki 51858, ka long tang 1.10 per cent.
Ka Mizoram kaba don ka ratio kaba 193/2459, ka poi 7.85 per cent, ha kaba kane ka pyni ba ka khambun ki longkmie kiba shah suba ba ki leh ïa ki kam runar ban ha ka ri baroh kawei.
Halor ki special bad local law (SLL), kumba 5.61 per cent ki kam runar ha ka SLL kiba jia ha jylla Meghalaya dei ki longkmie. Kane ka jingkheiñ ka pyni ruh ka jingkiew kaba 8.95 per cent ha Nagaland, bad kumba 17.82 per cent ha Mizoram, kumba 9.59 per cent ha Arunachal, 12.83 per cent ha Manipur, 2.76 per cent ha Sikkim, 0.93 per cent ha Assam bad kumba 11.12 per cent ha Tripura.
