Shillong, Risaw 06 : U MLA ka Jirang Bah Sosthenes Sohtun u la pynpaw ïa jingkmen kaba khraw ba u Myntri Rangbah ka Jylla u la jied ïa u ban shimti ïa ka shuki Myntri bad khamtam eh ban aiti ïa ka tnad Community and Rural Development kaba dei ka tnad kaban peit ïa ka roi ka pa jong ki shnong ha ki nongkyndong.
“Nga dei u MLA ba mihkhmat ïa ka constituency nongkyndong bad kumta nga sngewkmen ba nga ïoh ban peit ïa ka tnad kaba nga don ka jingtip bad ka jingsngewtynnad,” ong u Bah Sosthenes haba kren bad ki lad pathai khubor ha kane ka sngi Nyngkong.
U Bah Sosthenes u la pynpaw ruh ïa ka jingthrang ban ïohi ba ka tnad C&RD kan don ka jingïajan bad ki paidbah khamtam na ka bynta ban wanrah shibun ki kam pynroi kiba ïadei bad ki thain nongkyndong.
Related Posts
“Ha ka taiew ban wan ngan sa lum ïa ka jingïalang bad ki Ophisar bad lehse hadien kata ngan sa lah ban ai jingtip shuh shuh sha ki paidbah ïa ki sienjam bad ki kam kiba kum ka tnad kan leh nangne shakhmat na ka bynta ka jingmyntoi ki paidbah ka jylla,” u la ong.
Katkum ka jingïathuh jong u, ka shim por haduh 18snem ïa ka Jirang constituency ba kan ïoh bat biang ïa ka shuki Myntri hadien u (L) JD Rymbai uba dei u MLA ba khatduh ban ïoh bat syndon haduh ka shuki Myntri Rangbah ka jylla.
Lah ban kdew hangne ba ka jingïoh jong u Bah Sosthenes ban ïoh bat ïa ka shuki Myntri ka la pynkmen ym tang ïa ka Jirang constituency hynrei jan baroh kawei ka distrik ki la pynkup burom ïa u namar kadei hadien bun bun snem ba ka Ri Bhoi District kan ïoh biang ban sei ïa u Myntri ha ka sorkar jylla.