Shillong, Risaw 06: Ka Shillong Lajong, kaba bat ïa ka nam lahduh, ka la ïoh ban jam ha khlieh duh ha ka thup kyrdan jong ka Shillong Premier League 2025 hadien ka jingjop kaba shongkun da 4-0 kol ïa ka Sawmer ha ka jingïalehkai kaba la long hynne ka janmiet jong ka Lah sngi U Blei ha SSA Stadium-First Ground, Polo.
Ka Lajong ka la pynthikna ïa ki 3 poiñ lyngba ki kol ba la thep da u Banlamkupar Rynjah (45’+3), u Emanbha Marbaniang (67’), u Iohborlang L Lyngkhoi (71’) bad u Franky Dkhar (84’).
Ka jingjop ka la buh ïa ka SLFC ha ka kyrdan ba ha khlieh duh da kaba kamai 15 poiñ, ka ïaryngkat bad ka Mawlai hynrei ka don ïa ka rekod jingjop ha ka jingïakhun ba ki ïakynduh pyrshah (head-to-head). Hynrei ka Nangkiew Irat (13 poiñ) ka lah ban knieh biang ïa ka kyrdan ba nyngkong lada ka lah ban pynliem noh ïa ka Langsning ha ka jingïakhun mynta ka sngi.
Haba phai sha ka jingïakhun, ka sur ïalehkai jong ka Sawmer ka long ba ka kham pynkhlaiñ ïalehkai shadien, da kaba pynshong nongrim bha ïa la ka jong ka jingkhlaiñ bad jingtlot jong ka kynhun haba ka aireng pyrshah ïa ka kynhun kaba khlaiñbor, kum ka Lajong.
Hynrei ha ka minit ba 20 u Jeffrey Jyrwa u la lah ban kyrda ïa ka freekick kaba la khyrwit lyngba u Iohborlang, pynban shuwa ban pynshong thait noh ïa ka jingïakhun jong ka kylla step u Banlamkupar u la ïoh ïa ka kabu ban pynkhihjar naka bynta ka Shillong Lajong.
Related Posts
Haba bteng ïa ka kylla miet, ka Lajong ka la sdang ban kham pynsted ban tehlakam ïa ka jingïalehkai, da kaba pynjur ban ñion bad tur shakhmat, kaba hangne, u rangap kol ka Sawmer u la ïeng ïada ïa la ka jong ka kol.
Hynrei hapdeng ka jingshah ñion kaba na ka por sha ka por, ka plie lad ïa ka Lajong ba kan ïoh pynkhih pat ïa ki kol kiba sah ki jong ka lyngba u Emanbha, u Iohborlang bad u Franky ban pynskhem ïa ka jingjop bad ïa ki lai point ba pura.
Haba phai pat sha ka kynhun ïalehkai ka Sawmer, ka sngewthuh ba kam long kaba suk ïa ka ha kane ka jingïakhun pyrshah ïa ka Lajong, pynban kaei kaba ka lah ba kan pynpaw hi ka long tang ba kan pynpaw lane ïalehkai bha bad kiwei pat ki kynhun kiba ïa ryngkat bor, bad da kane ka namrem ka la pynlong ïa ka kynhun ba kan ïai neh ha ka kyrdan kaba san hadien ba ka la ïoh ba kan khur 9 poiñ.
Ha kane ka sngi Ba-ar, kan dei kawei na ki jingïakhun ka ban itynnad bad kaba jur bha ka jingïaknieh ïa ki lai point hapdeng ka Nangkiew Irat SC bad ka Langsning FC, khamtam lei lei ba ka Nangkiew Irat kan ïakhun ban knieh biang ïa ka kyrdan ba nyngkong katba ka Shillong Lajong bad ka Mawlai kin ap khmihlynti ïa kaei kaban jia bad kaban mih na kane ka jingïakhun.
Ka Nangkiew Irat kan jam sha kane ka jingïakhun hadien ba ka la ïoh ban kamai 13 poiñ, katba ka Langsning FC ka don ha ka kyrdan kaba saw hadien ba ka la ïoh ban khur 11 point, kane ka jingïakhun kan sdang ha ka por 4:30 nohphai sngi.