Shillong, Risaw 06: Ka Ibashembha Khongsit jong ka Mawlum Tyrsad SC, ka la thep saw kol marwei ban ïalam ïa ka kynhun sha ka jingjop kaba shongkun, ban pynliem noh da 8-0 kol ïa ka Mawsawrit SC ha ka jingïalehkai jong ka Group B ha ka lympung jong ka Meghalaya Women’s State League 2025 kaba la long ha ka sngi Saitjaiñ.
Ki ar tylli kiwei pat ki jingïalehkai ki la kut da 2-1 kol, ha kaba ka Mawten SC ka la pynliem ïa ka Young SSCC, katba ka Pay For Right FA ka la jop pyrshah ïa ka Na Rympei FA.
Ki thei ïalehkai kiba la pynkhihjar ha ka jingïalehkai ‘derby’ jong ar tylli ki klob ka Tyrsad Area Sports Association kaba la long ha madan Mawlum Tyrsad ki long ka Ibashembha (4′, 59′, 75′, 83′), ka Irilang Khongsit (6′, 29′) bad ka Naisha Nongrum (9′, 10′).
Related Posts
Ha ka Group-A ha SSA Stadium ha Shillong, ka jingïakhun ka la long hapdeng ka Na Rympei FA (Ri-Bhoi District Sports Association) pyrshah ïa ka Pay For Right FA (Shillong Sports Association), kiba la wanrah ïa ka jingïalehkai kaba itynnat bad kaba marïabiang bor.
Hadien ka kylla step kaba khlem kol, ka PFR ka la pynkhihjar ar sien bad baroh ar kidei kiba la thep da ka Nisilia Majaw (75′, 77′). Ka Cynthia Mylliem Umlong ka la ïoh ban pynphai shi kol ha ki minit pynjlan shuwa ban wai (90’+3) na ka bynta ka Na Rympei.
Da kane ka resol ka PFR ka la ïoh ban lehkmen ïa ka jingjop kaba ar sien lynter katba ka Na Rympei ka la mad biang ïa ka jingshah rem kaba ar sien.
Hadien kane, ka jingïalehkai hapdeng ka Young SSCC pyrshah ïa ka Mawten SC ha ka Group B ka la kut ha kajuh ka rukom, ha kaba ka Mawten (Mawkyrwat DSA) ka la lamkhmat da ar kol lyngba ka Larihun Sohthiang (58’) bad ka Bankyntiew Ryntathiang (67’) hashwa ba ka Titful Sohbar (83’) kan pynphai shi kol na ka bynta ka Young SSCC jong ka Pyndengumiong DSA.