Nongthliew, Risaw, 05: Ka ophis treikam jong ka District Legal Services Authority DLSA West Khasi Hills District, ka la rakhe ïa ka sngi kyrpang ki riew tymmen kaba la tip kum ka Senior Citizen Day, ha ryngkat ka jingai jingpynshai halor ki aiñ kiba ïa dei bad ka hok kaba kyrpang jong ki riew tymmen, lada jia ki jingshah thom bor lane ïakynduh ïa ki jingeh lane wat bad ki kam aiñ. Ïa kane ka Prokram la pynlong hapoh ka Dorbar hall jong ka shnong Nongthliew Eastern West Khasi Hills District.
Ka jingpynlong ïa kane ka program, ka long ruh ban pynpaw shai ïa ka jingdonkam ban ñiewkor bad kyrshan ïa ki riew tymmen, namar ki dang ïai don ka bynta ba shitrhem ha ka imlang sahlang kiba long ki nongprat lynti na ka bynta ka pateng ban sa wan.
Ha kane ka Prokram la ïadonlang ki riew shemphang kiba kynthup ïa u ALADC u bah D.D Diengdoh, u ba la ai ka jingpynshai halor ka legal Services katkum ka senior citizen scheme 2016, ka Maintenance and welfare of parents and Citizens act 2007 & Social Assistance scheme.
Kumjuh ruh la ïoh ïa ka jingpynshai na ka Ophis BDO lyngba ka kong T.L.Mawlong, kaba la ai jingpynshai halor ka Skhim kyrpang ki riew tymmen na ka ophis jong ka Block bad ka kong L.Nongrem ALADC, ka la pynshai shaphang ka NALSA scheme, ka jingïarap ei khlem da donkam ban siew pisa da ka NALSA ïa ka bai ïasaid aiñ ne bai kot bai sla na ka bynta ki briew ba duk bad ki riew tymmen lada I donkam. La pynshai paidbah ruh halor u Helpline No 15100 jong ka NALSA.
Ha kane ka prokram la sakhi ïa ka jingïadonlang u Sordar ka shnong Nongthliew ki nongshong shnong lem bad ki riew tymmen na kane ka dong ka thaiñ.
