Shillong, Jylliew, 30: Saw ngut ki nongbylla bar jylla ki la mynsaw jur hadien ba ki la shah tangon bad shah shoh ha ki katto katne ngut ki runar hynnin ka sngi Balang.
Katkum u kyrwoh ba la phah da u Superintendent of Police ka East Khasi Hills District u Bah Sylvester Nongtnger, la ïathuh ba kane ka la jia ha ka por kumba 6:10 baje janmiet katba kine ki saw ngut ki nongbylla bar jylla kiba leit tah tiles ha kawei ka ing ha Jaïaw ki dang thmu ban leit phai noh sha la ing hadien ba la prem miet.
Katba ki dang poi hajan ka jingkieng Jaïaw Umpohliew, kine ki saw ngut bad kynthup ruh u nongniah jong ka local Taxi ki la shah khang kdong ha ki katto katne ngut ki briew bad shah pynmynsaw da u tyrnem.
U SP u la ïathuh ba ki dkhot jong ka Village Defence Party (VDP) kiba la ïohi ïa kane ka jingjia ki la leit ban tuklar mar mar bad beh thong ïa kine ki runar ha kaba ki la ïohbat ïa uwei uba donkti katba u dang mareh shaphang ka surok Mawlai Phudmuri, Madan Heh.
Tang shu ïoh jingtip ïa kane ka jingjia na ki bor pynïaid shnong, ki Pulit ki la leit mar mar sha katei ka jaka bad pynit noh ïa kine kiba la mynsaw sha Shillong Civil Hospital ban ïoh jingsumar, ha kaba uwei na ki, u la shah bat noh ha Hospital namarba la kham jur ka jingmynsaw.
Hadien kane, da ka jingïarap jong ki bor pynïaid shnong ki Pulit ki la pynlong ka jingthwet kaba jur bad ïohkem ïa san ngut kiba donkti napdeng ki hynriew ngut, katba lai ngut ki dei kiba dang hapoh ka rta kaba 18 snem.
Ha kaba ïadei bad kane, ki Pulit ki la register case ha Lumdiengjri Police Station bad pynngat kyndon hapoh ka Section 341/326/34 jong ka Indian Penal Code.
Ki Pulit ki la lap ksai ruh ba kine kiba la shah kem ki dei kiba ïadon bynta lang bad ka kynhun Gang niah thuk thuk ar shaka kiba donkti ban shoh pynmynsaw ïa ki arngut ki samla pule na Kerela ha ka 24 tarik mynta u bnai ha Jaïaw, Shillong.
Ha kane kajuh ka miet, sa uwei pat u runar uba ïa donkti ha ka jingktah kti bad shoh pynmynsaw ïa ki arngut ki samla pule na Kerela u la shah kem ha ki Pulit.
Kat haduh mynta ki don 11 ngut kiba la shah kem ha ki Pulit.
“Ki Pulit ka East Khasi Hills District ki dang pynlong ka jingthwet kaba jur ban nang ïohkem shuh shuh sa ïa kiwei pat kiba donkti,” ong u SP u Bah Nongtnger.
U Director General of Police (DGP) ha ka jingïakren bad ki lad pathai khubor ha ka sngi Palei u la ong ba lada ki samla ki don kano kano ka daw ki dei ban wan ïakren bad ki bor Pulit khnang ban weng ïa kino kino ki jingeh ba ki ïakynduh hynrei ym ban shu shoh bad ktah kti khlem daw.
