Shillong, Jylliew, 30: Ka Deputy Commissioner jong ka East Khasi Hills District, ka Kong Isawanda Laloo ha ka sngi Balang ka la pyllait paidbah ïa ka Payment for Ecosystem Services (PES) Scheme ha ka jingïalang kaba la pynlong da ka ophis Deputy Commissioner ryngkat ka jingïatrei lang bad ka Meghalaya Basin Management Agency (MBMA) bad ka District Project Management Unit (DPMU), East Khasi Hills.
Lah ban kdew hangne ba ka PES Scheme ha ka jylla la pyllait paidbah da u Myntri Rangbah ka jylla, u Conrad K Sangma ha ka 13tarik mynta u bnai.
Kane ka skhim ka ai jingmyntoi lyngba ka jingkyrshan pisa kaba 8000 tyngka shi hectare shisnem na ka bynta san snem. Nalorkata, la ai khusnam tam ruh sa 5000 tyngka shi hectare shisnem na ka bynta kito kiba pynneh ïa ki khlaw ki btap kiba la dep rejistar kum ki khlaw shnong ha ka tnad Forest. Nalorkata la mang ruh 2000 tyngka shi hectare shisnem na bynta kito ki khlaw ba rben bha ba ju tip kum ki khlaw kyntang lane kiba don ïa ki jingkieng diengjri lane kiba don ha ki jaka ba sumar kyrpang kum ki national park lane ki wildlife sanctuary.
La pynbna ruh ba lada ki don ki khlaw ki bym pat rejistar, ki paidbah ki lah ban rejistar bad ka tnad khlaw lane ban pan jingthoh haba ki aplai na ka bynta ka PES Scheme.
Na ka liang ka DC ha ka jingkren jong ka, ka la batai bniah halor ka jingthmu jong ka PES da kaba ong ba katei ka skim kaba pyntreikam hapoh ka Community Led Landscape Management Project (CLLMP), ka buh thong na ka bynta ban kyrshan pisa sha ki shnong, ki imlang sahlang, ki kur bad ruh ki riewshimet kiba kloi ban pynneh pynsah ïa ki khlaw ki btap na ka bynta 30 snem.
Da kaba kam ba ka Meghalaya kaba dei ka jylla kaba hap ha ka Khyrnit kaba Hynriew bad kaba bun na kitei ki jaka ki hap ha ki jaka khlaw kiba dei jong ki paidbah bad ki shnong ki thaw. Kumta ka ong ruh ba dei lyngba katei ka skim ba yn lah ban pynkupbor ïa ki shnong ki thaw bad pynkupbor ban pynneh pynsah ïa ki khlaw ki btap.
