Nongpoh, Jylliew 30: Ka seng Federation of Khasi Jaiñtia and Garo People (FKJGP) Western Zone kala dawa naka sorkar bad ka tnad PWD ba ka dei ban shimkhia halor ka jinglong jingman jong ka jingkieng Lailad ha Ri-Bhoi kaba la buh jingma ïaka leit ka wan ki paidbah namar katei ka jingkieng kala sdang ban tor bad don ruh ki dak.
Ka jingkieng Lailad ka dei ka jingkieng kaba la tei naduh u snem 1986 bad kadei ruh kawei naki jingkieng ban pynïasoh ïa spah tylli ki shnong jong ka thaiñ Ri-Bhoi Sepngi bad kaba donkam eh ha katei ka thaiñ ha kaba wat naka liang ki nongïalam shnong kila ju dawa ruh naka por shaka por ban shna noh da ka jingkieng thymmai namar kam long shuh wat ban ïaid ki kali kit khia kiba palat ïaka 9 ton.
Naka liang u Bah C Doloi President ka FKJGP Western Zone u la ong ba kum ka seng da ka dap da ka jingsngewkhia kaba jur halor ka jinglong jingman katei ka jingkieng kaba la don ruh ki dak bala pyntor ïa katei ka jingkieng kaba lah ban buh jingma ïaki paidbah bad lah ruh ban khyllem ha kano kano ka por.
Namarkata naka liang ka seng kala dawa naka sorkar ba kadei ban shimkhia ban shna thymmai ïa katei ka jingkieng naka bynta ka jingbit jingbiang bad ban nym buh jingma ïaki paidbah haka leit ka wan.
