Mad jingeh kiba ñiah kali ba sniew bad dap tang da ki thliew ha surok Garikhana

Shillong, Risaw 04: Ha kine ki sngi la ïohi ba kiba bun na ki kali kamai bad ki kali shimet ki la hap ban mad ïa ka jingeh kaba manla ka Sngi haba ki ïaid napoh ka surok ba shilynter jong ka surok Stand Jeep ne Garikhana na ka daw jong ka jingsniew palat jong ka surok.
La ïohi ruh ba ha kine ki Sngi ba kane ka surok ka la sniew la jan baroh shilynter bad ba ka la dap tang da ki thliew ki syar suda ha kaba kane ka la wanrah shisha ïa ka jingeh jingjynjar ïa ki kali kiba ïaid na kane ka surok.
Manla ki kali kiba ïaid na kane ka surok ki la hap ban ïaid khongwaiñ ban lait na ka jinghap ban ngam ha ki thliew ki syar ban ym julor ki kali jong ki.
Kawei na ki daw ka long ba kane ka surok kaba ïai bteng ban sniew manla ka por ka lah ban dei na ka jingbym ïoh ïaid ne tuid bha jong ka um hynrei ha kiba bun ki jaka ka um ka lang hapoh kine ki thliew.
La ïohi ruh ba ha kane ka surok la shu maramot tang da kaba shu pyndap da ka khyndew kaba la khleh lang bad ki maw bad tang shu jur u slap ne tuid ka um slap kane ka khyndew ba la shu pyndap ka la shah rong noh ha ka um slap kaba jur bad kaba kit noh ïa kine ki khyndew.
La ïohi bad katba nangmih ki Sngi kane ka surok ka la nang sniew nang sniew lada ym lah satia ban shna bad maramot bha ïa ka khamtam ha ki por ba rkhiang ka bneng.
Kumta la donkam ïa ki bor badei khmih khamtam eh ïa ka tnat PWD roads ba kan khmih bad ban shim ki lad ki lynti ban shna bad maramot noh kham kloi.