Kynnoh ka ASPF ba shah pyndik, shah dawa pisa kiba ïaid na surok Tura-Paikan ha ki pulit Assam

Shillong, Risaw 04: Ka Achik State Peoples’ Front (ASPF) ka la phah ka jingujor sha ka Director General of Police (DGP) pyrshah ïa ki pulit jong ka jylla Assam halor ka jingpynjynjar shah pyndik bad mad ka jingshah dawa pisa.
Katkum ka jingkynnoh jong kane ka kynhun, ka la don ka jingjia kaba manla ka por jong ka jingshah pynjynjar bad ka kam dawa pisa ba la mad da kiba ïaid lynti napoh jylla Meghalaya haba ki ïaid napoh ka surok ba shi lynter jong ka Tura-Paikan-Guwahati road, khamtam eh ha ka surok kaba long hapdeng ka Bajengdoba bad Paikan, ha kaba la kynnoh ba dei ki pulit jong ka Kukurkata Outpost, pulit Assam kiba la donkti ha kane ka kam.
Na ka liang ka ASPF ka la kynnoh ba ki pulit Assam ki tang shu ïohi ïa ki kali kiba don u nombar ka Meghalaya ki la pynsangeh kum ka routine khlem da pyni ïa kino kino ki daw. Watba la pyni ïa baroh ki kot ki sla kali, kiba ïaid na kine ki surok ki ngat ha ki jingshah pyntieng, shah byrngem bad ki jingshah tohkit ki bym shongnia.
“Kitei ki Officer ki dawa pisa beit beit na ki nongñiah kali; lada kyntait kamut ki hap mad barabor ki jingshah pynjynjar, ki shah byrngem ban kurup noh ïa ki kali ne ki jingshah pynslem ki bym donkam eiei. Wat kiba shong kiba sah marjan bad u pud u sam jong ka jylla Assam ki la pynpaw ïa kajuh ïa ka jingeh, bad ki mad ruh ki jingtieng bad ki jingbym lah ban shaniah haba ki pyndonkam ïa kine ki surok,” kynnoh ka seng.
Ka ASPF ka la kynnoh ba kum kine ki kam ym tang ba ki wanrah ïa ka jingsngew bym shongshngaiñ ïa kiba ïaid na kine ki surok hynrei ka wanrah ruh ka jingbym shongsuk ka jingïadei hapdeng ki nongshong shnong kiba sah marjan jong kine ki artylli ki jylla.
Haba ong ba kane ka surok ka long kaba kongsan na ka bynta ka jingkiew ka ïoh ka kot bad ka jingbha ha ka imlang sahlang, ka long kaba kongsan ban don ka jingïatreilang bad ban buh ki jubab kiba beit. Kumta na ka liang ka kynhun ka kyntu ïa ka DGP ban ïakren ïa kane ka kam bad ka Assam Police Headquarters, ban thaw ka jingkhmih bniah da kaba ïatreilang hapdeng ki pulit jong baroh artylli ki jylla khnang ban ai jingshngaiñ bad jingïada ïa ki hok jong kiba ïaid na kane ka surok, bad donkam ruh ban don ka jingïaid pahara lang ne joint patrolling ne ban buh ki lad ki lynti ba ki briew kin ïoh ban ujor haba ki mad ïa ki jingshah pynjynjar ha ki pulit ka Assam ha kine ki surok.