Shah siat ïap u samla pule na India ha ki runar napoh ka ri United States of America

New Delhi, Risaw 04: Uwei u samla pule uba na jylla Hyderabad u la shah siat ïap ha ki runar hapoh ka shnong Dallas, ka ri United States, ïathuh ki bahaïing hasem jong u ha ka sngi saitjaiñ.
Utei u lanot uba la 26 snem ka rta uba kyrteng u Chandrashekar Pole, uba la pyndep ïa ka jingpule Bachelor ha ka Dental surgery (BDS) na Hyderabad, u la leit sah sha US ha ki arsnem mynshwa ban pyndep ïa ka jingpule master degree.
U la pyndep ïa ka degree 6 bnai mynshwa bad u dang wad kam hapdeng kane ka jingpule jong u, ïathuh u ba shipara bad u, u Damodar sha ki lad pathai khubor. Ban kyrshan ïalade, u Chandrashekar u la leit trei part-time ha ka gas station, ha kaba kane ka jingjia ka la jia ha ka miet jong ka sngi Thohdieng, bynrap u Damodar.
U Myntri Rangbah ka jylla Telaagana u A Revanth Reddy u la pynpaw ka jingsngewlem sha ka longïing kaba la mad ïa kane ka jingjia ba sngewsih bad u la pynthikna ïa baroh ki lad jingïarap bad ki jingkyrshan na ka bynta ban poi ïa ka met kaba sah jong u na ka ri United States of America. “Ka jingïap jong u Pole Chandrasekhar, u samla pule na LB Nagar, ha ka jingjia ba shah siat da ki runar ha ri America ka la wanrah ka jingkyndit kaba khraw bad ka jingsngewsih. Nga duwai ha u Blei ba ka mynsiem jong u kan ïoh jingsuk bad nga pynpaw ruh ka jingsngewlem sha ki dkhot jong ka ïing ka sem jong u,” pynpaw u Reddy ha X.