Hiar lut ki specialist ban ai jingsumar kyrpang ha ka shnong Rongramgre, ïaroh ka DC ïa ka tnad

Shillong, Risaw 04 : Kum shi bynta jong ka jingïalap shaphang ka Swasthya Nari Sashakt Parivar Abhiyan (SNSPA) ha South West Garo Hills, na ka liang ka District Health Society ka la pynlong ïa ka Health Mela kaba shisngi ha ka shnong Rongramgre kaba hap hapoh ka Belbari PHC ha ka sngi Nyngkong bad ïa ka jingai snam ei pat ha phyllaw jong ka Ampati Civil Hospital ha ka sngi Ba-ar.
Ïa kine ki jingïalang la pynlong hapoh ka jingïalam jong ka Hema Nayak, Deputy Commissioner & Chairperson ka District Health Society.
Ha kane ka Health Camp la sakhi ïa ka jingïashim bynta kaba bun bha na ka kynhun ki nongsumar baroh kynthup ïa ki specialist na ka Ampati Civil Hospital, kiba la ai lut ki jait jingsumar ïa ki nongpang kiba wan sha katei ka prokram kyrpang na ka bynta ki nongshong shnong.
Haba ïakren bad ki dkhot jong ka Village Health Committee (VHC), ki SHG, bad ki nongïalam shnong, ka Deputy Commissioner ka la pynpaw ïa ka jingdonkam ban leit pyni ïa ka koit ka khiah jong ki nongshong shnong, ki bahaiing ha sem baroh kynthup ïa ki rangbah.
Ka la ban jur ruh ïa ka jingdonkam jong ka jingbam kaba tei ha ka por mynstep na ka bynta ki khynnah kiba leit skul, da kaba pynksan ba ka jingbam ïa ki jingbam ba tei ha ka por mynstep ka wanrah ïa ka met kaba shait kaba khlain bad aibor baroh khamtam wat ïa ka bor jabieng.
Haba ïaroh ïa ka tnad ka Koit ka Khiah kaba la jied ïa katei ka shnong kaba jngai kum ka Rongramgre na ka bynta katei ka jingai jingsumar ei, ka Nayak ka la kdew ba ka jingwanrah ïa ki jingshakri ha ka koit ka khiah sha ki jaka ba duna ka jingshakri ka ïahap shisha bad ka thogn treikam jong ka SNSPA. “Ka jingpynlong ïa ki prokram halor ka koit ka khiah ha ki shnong pajih na ki jaka sor ka pynthikna ba ngin poi sha kito kiba donkam eh,” ka la ong.
Ka tnad ka la pynbiang bun bha ki jingsumar ba kyrpang na ka liang ki specialist kynthup ïa ka ENT, ka jingsumar kyllum, ka Obstetrics & Gynaecology, ka jingsumar ïa ki khmat bad ki bniat, kumjuh ruh ki jingpeit bniah ïa ki jingpang bym saphriang (NCDs), ka jingpang TB lyngba ki X-ray, bad kiwei kiwei ki jingpeit bniah ba kongsan.
Kum ka jingbteng ïa ka jingïalap jong ka SNSPA, ka jingai sname ei kaba la pynlong ha Ampati Civil Hospital ha ka sngi Balang ka la ïohi ïa ka jingïashim bynta kaba radbah na ki heh sorkar, ki nongtrei ka koit ka khiah, bad ki nongshong shnong, namar da ki phew ngut ki la wan shakhmat ban ai snam.
Ïa kane ka prokram la sdang ha ka 17 tarik u Nailur bad kane ka prokram jong ka SNSPA kaba neh ar taiew ka don ia ka thong ban kyntiew ïa ka jingpeit bniah ïa ka koit ka khiah kaba bniah na ka bynta ki kynthei, ryngkat bad ka jingai dawai bad ka jingkyrshan ïa ki jingbam ba tei ban pynduna ïa ka jingïap jong ki longkmie bad ki khunlung. Kane ka prokram ka la kut noh ha kane ka sngi 02tarik mynta u bnai.