Ba twa khyndew ki bri ha ki jaka rep, duhnong bun ki nongrep ka thaiñ Manad ïa ki mar rep

Mawkyrwat, Jylliew, 30: Da ka jingwan jong u slap u uba jur ha kine ki sngi ka la long ka jingduh nong kaba khraw ym tang ha ka ïaid ka ïeng jong ki paidbah lyngba ki lynti ki synkien, ne don ka jingtwa jong ki pynthor kba hynrei mynta ka la don ruh ka jingtwa khyndew ha ki jaka rep jong ki nongrep ka thaiñ Ri War.
Katkum ka jingïoh lum jingtip la ïathuh ba ka jingtwa khyndew jong ki ranab lum ka dei ha thaiñ Manad ha kaba haduh 13 tylli ki jaka rep jong ki nongshong shnong jong ki 5 shnong kata ka shnong Mawbidong, Pyndenlyngdoh, Lummawbah, Manad bad Pyndensohlang ki la shah pynjulor noh ha ki bor ka mariang.
Halor katei ka jingshah ktah ki jaka rep katkum ka jingïathuh jong ki katto katne kiba dei trai jaka rep u bah Shiningstar Shangdiar, kong Ibanniarlyne Syiemlieh, bah Kharestar Kharbhih, bah Kupborlinsar Syiemlieh, bad kiwei de ki nongrep ki la pynpaw ka jingsngewsih kaba khraw halor kitei ki jingshah pynjulor ki jaka rep ba ki ju im bad kamai jakpoh ha ka kam rep ka riang lyngba ka jingleit die ïa ki mar rep jong ki ba kynthuh naduh u kwai, u tympew, u sohmarit, u synsar, ki kynja soh bad kiwei de ki mar rep ki la shah pynjulor baroh na ka daw ka jingtwa ki lum bad ka jingshah tap noh ha ka khyndew.
“Une u snem ba mynta u la long shisha u snem jong ka nem sniew ba shyrkhei ba kim shym la ïohi bad ïoh mat shisha naduh mynno mynno ruh ha ki phew snem ba la dep tang u snem ba mynta”, ong ki nongrep bad ka la jia ba wat ki lum bad ki jaka rep ki la twa lut kaba ym lah mutdur shisha ha kaba ka jinghap ka khyndew ka la long kum 200 metre ei ei ka jingheh bad ka jingjrong la i kumba 2 kilometres ei ei ba ka khyndew ka la hap na kine ki jaka rep jong ki.
Ha kaba ïa dei bad ki lad jingïarap na ki bor sorkar, ki nongrep ki la ïathuh ba ki la leit ban mih ruh ban pan jingïarap napoh jong u ophis Block Development Officer, C&RD Block Mawkyrwat bad kumjuh ruh napoh ophis jong ka District Horticulture Officer (DHO), South West Khasi Hills District mynta ka taïew bad ki la buh ka jingkyrpad ba lyngba kine ki tnad ophis bad kumjuh ruh ka sorkar jylla kin sngewbha ban thaw lem ki lad ki lynti ne ai ki jingïarap na ka bynta jong ki nongrep halor kine ki jingshah pynjulor, namar kum ki nongrep ki la duh jingkyrmen ha baroh ki liang. “Nangno ngin ïoh biang ban thung ne ïoh biang ïa ki symbai jingthung ban pyndap pynbiang ïa ka ïing ka sem na ka bynta une u snem bad ha ki snem ban wan namar ba kine ki jaka ki la syllen lut bad sa tang ki riat ki ram kim i donbor shuh ban dang leh ei ei ïa ki jaka rep jong ki”, la pynpaw ki nongrep jong ka thaiñ Manad.
Ha kajuh ka por ki la ong ruh ba katkum ka jingïoh jingkheiñ jong ki ïa ki mar rep kiba mih na kitei ki jaka manla u snem ki kot haduh 1 lak tam ki don ruh kiba haduh 3 lak ei ei ki jingpynmih pisa kynthup lang ïa baroh ki mar rep kiba mih na kitei ki jaka kiba la shah ktha bad shah pynjulor ha ki bor jong ka mariang.
Ym tang kata, ba ki la buh ka jingkyrpad ïa ki ophis sorkar, hynrei da ka mynsiem jong ka jingsngewkhia ki la buh ka jingkyrpad ruh ïa ki nongmihkhmat naduh u MLA bad MDC ba kin sngewbha ban tuklar bad thaw lem ki lad ki lynti ban ai jingïarap na ka bynta ki jong ki ba ki la mad kum ha kane ka apot.