Nongstoiñ, Jylliew, 30: Ka long ka khubor kaba bha bad kaba pynsngew tynnad ïa ka Seng Khasi Nongstoiñ West Khasi Hills kiba dang ngeit ha ka Niam Tynrai, namar ka jingïoh lad jong ki ban tei ïa ka jaka thang met ïap ha ka shnong Sylleiïawkheiñ.
Haba ïakynduh markhmat bad u bah Hemborlin Kharsyntiew u ba dei u sordar ba shi por jong ka shnong Sylleiïawkheiñ, u la ong ba ha ki por kiba dang shu dep ka shnong ka la shim ïa ka rai ban ym shah da lei lei ïa ka Seng khasi ba kan shna ne tei ïa katei ka ïing kaba dei ka jaka thang briew.
Hynrei, hadien ba ka shnong ka la puson bha bad hadien ïa ka jingïathir jingmut kaba jur, ka shnong lyngba ka dorbar shnong Sylleiïawkheiñ, da kawei ka sur ka la shim noh da kawei ka rai bad ban shah noh ïa ka Seng khasi ba kan tei ïa katei ka jaka thang briew ha katei ka shnong.
