Shillong, Risaw 03: Ka Rangdajied United ka la ïoh ban khur ïa ka jingjop kaba donkam tam da kaba pynliem noh ïa ka Malki da 4-1 kol ha kawei na ki jingïalehkai jong ka lympung Shillong Premier League 2025 kaba la long ha ka janmiet jong ka sngi Thohdieng, 03 tarik Risaw, ha madan First Ground-SSA Stadium, Polo.
Ka Rangdajied ka la pynkhihjar lyngba u Denelson Pyngrope (16’P), u Pasborlang Khonglikong (64’), u Wansiewdor Nengnong (76’) bad u Freddy Jyrwa (79’). Katba ka Malki ka la thep lyngba u Hilford Lyngkhei (39’).
Kane ka dei tang ka jingjop kaba ar jong ka RUFC mynta ka samoi – ka la jop shi sien kham mynshwa, ïakhaid 3 sien bad rem 2 sien, bad ka jingjop ka la kyntiew ïa ka sha ka 9 poiñ bad sha ka kyrdan ba hynriew ha ka thup kyrdan jong ka miej. Ka ïaryngkat bad ka Sawmer ha ka jingïoh kamai poiñ bad ka don ruh ka jingïapher kol kaba kham bha (-1 la -8) hynrei ka Sawmer ka don ïa ka rekod jingjop ha ka jingïakhun pyrshah ïa ka Rangdajied (head-to-head) ha ka 10 tarik Nailur. Ka Malki ka dang sah ha ka kyrdan kaba 8, bad lait tang shi kyrdan na ka thup kyrdan shah sloit (relegation zone), da kaba kamai 6 poiñ.
Ka jingïalehkai ba nyngkong jong ka kylla kaba hynñiew (Round 7) ka la sakhi ïa ka Rangdajied ba ka la pynkhihjar nyngkong lyngba ka penalty hadien ba u Micky Marwein u la shah pynur hapoh phyllaw kol (box). Nangta u Denelson Pyngrope u la shimti ïa kane ka kabu, da kaba shut sar napoh u rangap kol ka Malki u Franklin Surong.
Hynrei ka Malki da ka rukom pashat bol kaba janai ka la ïohlad ban pynïakhaid shuwa ban kut ka kylla step lyngba u Hilford.
Ka Rangdajied ka la ïoh biang ban lamkhmat ïa ka jingïalehkai hapoh 20 minit jong ka kylla miet lyngba u Pasborlang.
Katto katne minit, ka la don ka jingpyni sap kaba kyrpang na u rangap kol ka Malki u Franklin uba la lah ban kerda ïa ka jingpyrshang thep kol jong u RT Hanson Pdang hynrei u khlem shym la lah pat ban leh eiei ban khanglad ïa ka kol kaba lai jong ka RUFC. Kane ka kol ka la jia syndet syndet, ha kaba u Wansiewdor u la rah ïa ka bol bad thep ha ka por ba mareh artad.
Hadien lai minit ka Rangdajied ka la pynthikna ïa ka jingjop da kaba thep ïa ka kol kaba saw lyngba u Freddy.
Ha ki hynriew tylli ki jingïakhun ba la dep ka Rangdajied ka la ïoh ban thep tang saw tylli ki kol baroh, kumta ka la lah ban kyntiew ar shah ïa ka jingthep kol jong ka tang ha kane ka jingïakhun. Watla ka jingïaknieh ïa ka nam lahduh jong ka SPL 2025 ka long ka jingphohsniew kaba jngai ïa ka kynhun, hynrei lah ban ong ba ka RUFC kan kwah ban bteng ïa ka jingïalehkai kaba bha shakhmat katba ka dang ïakhun ban pyndep ha ka thup kyrdan Top 6, kaba lah ban buh ïa ki ha ka jingïakhun na ka bynta ka SSA Super Cup, ka ban bud ïa ka SPL.
Ha kane ka sngi Saitjaiñ, 04 tarik Risaw, ka Mawlai kan ïalehkai biang pyrshah ïa ka Laitkor ha ka por 4 shiteng janmiet. Ka Mawlai kaba don ha ka kyrdan balai ka la shah rem ha ka Shillong Lajong ha ki khyndiat sngi mynshwa bad ka donkam ban pynkhie im biang ïalade na katei ka jingshah rem. Ha kawei pat ka liang, ka Laitkor kaba don ha ka kyrdan kaba hynñiew, ka don ha ka jingïaid lynti kaba lai sien lynter khlem shah rem bad kan thmu ban pynjlan ïa ka jingïakhun kaba khlem shah rem pyrshah ïa ka Mawlai.
