Shillong, Risaw 03: Ka Bright Future SSCC, ka Young SSCC bad ka Diengshynrum SC ki la jop ha la ki jong ki jong ki jingïakhun jong ka lympung Meghalaya Women’s State League 2025 hynnin ka sngi Palei. Baroh lai tylli ki kynhun ki la jop da 2-0 kol.
Ha ka Group B kaba la long ha Mawlum Tyrsad Ground, ka Bright Future SSCC (jong ka Pyndengumiong District Sports Association) ka la pynliem noh ïa ka Mawten SC (jong ka Mawkyrwat District Sports Association) shuwa ba ka Young SSCC (jong ka PDSA) kan pynliem pat ïa ka Mawsawrit SC (jong ka Tyrsad Area Sports Association). Ka Banrisha Kyrsain (20’) bad ka Lavina War (68’) ki la pynkhihjar na bynta ka Bright Future, ka R Syiemlieh (9’) bad ka J Ryntathiang (11’) ki la thep na ka bynta ka Young SSCC.
Ha ka Group C, ka Diengshynrum (East Jaintia Hills District Football Association) ka la jop pyrshah ïa ka Chirupheiwi Nongkynrih FC (Laskein Block Sports Association) ha ka jingïalehkai kaba la pynlong ha Laskein. Baroh ar tylli ki kol la thep da ka Charlinda Nongtdu (70′, 80′).
Watla ka jinglong jingman ha Tyrsad ka long kaba shitom ïa ka jingïalehkai ha katei ka sngi namar u slap uba jur bad ka jingrben u lyoh, hynrei, ki nongïalehkai ki la pyni ïa ka jinglong shlur bad ka jingkut jingmut ban nym ailad ba kane kan khanglad ïa ki katba ki dang ïakhun ban khur ïa ka jingjop ïa la ki jong ki klob.
Ka Tyrsad Area Sports Association ka la don ïa ka histori kaba slem bha ban kyrshan ïa ka jingïalehkai phutbol jong ki kynthei, ha kaba ka dei kawei na ki synjuk District ba nyngkong eh ban pynlong man ka por ïa ki lympung ïalehkai phutbol jong ki kynthei. Bun na ki nongïalehkai kiba la mihkhmat ïa ka jylla ne kiba la leit ban ïalehkai ha ki klob ha kylleng ka ri ki la ïoh bynta ban ïalehkai ïa ka phutbol jong ka TASA league.
Ki jingïalehkai ha kane ka sngi Saitjaiñ: Group A – Na Rympei Football Academy pyrshah ïa ka Pay For Right Football Academy, ha ka por 10 baje mynstep, ha SSA Stadium, Shillong; ha ka Group B kin don ar tylli ki jingïakhun, ha kaba ka Young SSCC kan ïakhun pyrshah ïa ka Mawten SC, ha ka por 12 baje mynsngi, bud sa ka jingïalehkai hapdeng ka Mawsawrit SC pyrshah ïa ka Mawlum Tyrsad SC, ha ka por 2 shiteng nohphai sngi, ha Mawlum Tyrsad Ground. Yn nym don jingïalehkai ha ka Group C.
