Shillong, Risaw 03: Ka Nongkrem SC ka la ïoh ban khur ïa ka jingjop da 3-1 kol ha ka jingïakhun pyrshah ïa ka Ryntih ha ka lympung ïalehkai phutbol jong ka kyrdan First Division 2025, ba la pynïaid da ka Shillong Sports Association ha madan First Ground-SSA Stadium, Polo, ha kane ka sngi Thohdieng, 03 tarik Risaw.
Ha kane ka jingïakhun u Balajied Lyngwa u la thep marwei da ka hat-trick ban pynthikna ba ka kynhun kan sdang ïa ka samoi da ka jingjop.
Baroh ki kol ha kane ka jingïakhun ki la wan ha ka kylla miet hadien ba ym shym la don ba lah pynkhihjar ha ka kylla kaba nyngkong. U Balajied u la pynkhihjar nyngkong ha ka minit kaba 60 shuwa ba u Bankyrshan Syiemlieh (80’) un pynïakhaid noh na ka bynta ka Ryntih.
Hynrei tang hadien shi minit u Balajied u la buh biang hakhmat ïa ka Nongkrem da kaba thep ïa ka kol kaba ar ha ka minit kaba 81 shuwa ban pynbud ïa kaba lai ha ka 89 minit ban pynthikna ïa ka jingjop.
Ka jingïalehkai jong ka SSA 1st Division Football League-2025 ha kane ka sngi Saitjaiñ, 04 tarik Risaw, kan long ha ka por 1:30 baje nohphai sngi hapdeng ka Pohkseh SC pyrshah ïa ka Nongkseh SC.
