Jowai, Risaw 03: Ka resol jong ka jingïalehkai ka lympung phutbol bala tip kum ka ‘Hajan Shylla Memorial Trophy 1st Division’ bala pynïaid da ka Thadlaskeiñ Sports Association (TSA) West Jaiñtia Hills kaba la long ha kane ka sngi Thohdieng, 03 tarik u Risaw, ha madan Wahiajer Multi-Sports Complex.
Haba phai sha ka jingïakhun kaba nyngkong jong kane ka sngi la sakhi ïa ka Namdong-B kaba la khur ïa ka jingjop da kaba pynliem noh da 2-1 kol ïaka Friends United.
Ha ka jingïalehkai ka Namdong-B ka la ïoh ban lamkhmat ar kol ha ka kylla step lyngba ki kol na u Draimos Phawa haka minit ba 22 bad u Felixson Lamare haka minit ba 35. Haba wanphai ha ka kylla miet, na ka liang jong ka Friends United ka la ïoh ban pynduna ïa ka kol lamkhmat lyngba u Nicos Laloo haka minit ba 46, hynrei kam shym la lah pat ban ïoh ïa ka kol pynïakhaid.
Haka jingïakhun kaba ar la ïohi ïa ka Ummulong SC kaba la jop suk da 4-1 kol ïaka Malngiang FC.
U Abiding Muksor (28 & 69’) bad u Lamphrang Dkhar (75 & 80) ki la noh synñiang ïa baroh saw tylli ki kol na ka bynta ka Ummulong SC, da kaba thep mar ar kol marwei ban pynthikna ïa ka jingjop. Katba ïaka shikol naka Malngiang FC la thep da u Nibiang Phawa (17’).
Ki jingïalehkai ha ka First Division kin wanphai biang ha ka 06 tarik Risaw, haka por 12 shiteng nohphai sngi ka Dongmihsngi SC pyrshah ïaka Tyrshang SC. Katba haka por 2 shiteng nohphai sngi ka Maya SC kan aireng pyrshah ïaka Lumshyrtoh FC.
