Pyrshah ka UDP ïa ka OM tih Uranium, ngin sa thoh sha ka MoEF&CC: Titostarwell Chyne

By Mawphor Editor On Oct 2, 2025

Shillong, Risaw, 01:U Secretary General jong ka United Democratic Party (UDP) u Bah Titostarwell Chyne ha ka sngi Baar u la pyntip ba ka party kan sa phah da ka jingthoh sha ka Ministry of Environment, Forest and Climate Change (MoEF&CC) ka Sorkar India ban pyrshah ïa ka Office Memorandum ba la pynmih ha ka 8 tarik, Nailur, 2025.
Ha ka jingïakren bad ki lad pathai khubor u Bah Titos uba long ruh u Nongïalam ka Liang Ïatei ha Khasi Hills Autonomous District Council (KHADC) u la ong ba ka jingpyrshah ka long halor ka daw ba ka Office Memorandum ka la weng noh ïa ka hok jong ki paidbah kaba khanglad ïa ka jingsngew jong ki lyngba ka public hearing.
“Ka party ka ladep shong jingïalang bad ngi la rai ban ai da ka jingthoh sha u Myntri ka Sorkar Pdeng uba khmih ïa ka tnat Environment, Forest and Climate Change (MoEF&CC). Ngan sa pynkhreh ïa ka jingthoh ban phah noh lashai ne mynta ka sngi,” u la ong.
“Ka nongrim kaba ngi pyrshah, ka daw ba kane ka Office Memorandum ka la weng noh ïa ka hok jong ki paidbah ba kin pynsngew ïa ka jingsngew jong ki lyngba ka public hearing. Khamtam ha kaba ïadei bad u marpohkhyndew Uranium, uba ngi tip lada tih ïa u ym dei tangba ka ktah ïa ka koit ka khiah hynrei ka pynjot syndon wat ïa ka mariang. Kito ki jaka kiba don sawdong ka jaka tih Uranium yn ym long shuh ban thung ban tep, ym long shuh ban rep ban riang, ym long shuh ban ri jingri khamtam eh ïa ngi u khun bynriew,” la pynpaw u Bah Titos.
“Na ka liang jong ka party ngim pat kwah, ngi dang pyrshah ïa ka jingthmu jong ka Sorkar Pdeng ban tih ïa u Uranium ha kane ka jylla jong ngi,” la banjur u Bah Titos.
“Ka Office Memorandum ka khanglad ïa ka kabu jong ngi ki paidbah ban pynpaw ïa ka jingsngew jong ngi. Kaei ka jingktah ïa ki sawdong sawkun baroh, kane ka Office Memorandum ka la khanglad ïa ka hok jong ki paidbah,” u la kynthoh.
“Ngi kyntu ïa ka Sorkar Jylla kaba ngi ïatreilang ba ka dei ban pyrshah ïa ka Office Memorandum,” u la ong.
Haba kylli, u la ong, “ka District Council ka buh ïa kawei ka kyndon kaba ong, ‘kano kano ka jingthmu ban tih marpohkhyndew ka don ïa ka lynti ba ka District Council ka dei ban ai ai ka No Objection Certificate (NoC) ne ka jingai jingbit. Nga sngew ba ka District Council kan pyndonkam ïa ka bor jong ka ba kim (Sorkar Inidia) lah ban leh ïa kano kano ka kam khlem ka jingbit na ka District Council.”