Shillong, Risaw 01: Ka Shillong Lajong ka la pynkhihwin da ka jingwanphai kaba ym pat ju ïohi mynno mynno ruh ha ka Shillong Premier League wat hadien ba ka la shah tam da 3 kol ban jop pat da 4-3 kol pyrshah ïa ka Mawlai ha ka jingïakhun kaba la long ha ka jan miet jong ka sngi Balang ha madan First Ground-SSA Stadium, Polo.
Ka Lajong ka la sdang ïa ka jingïalehkai kaba lah ban long ka jingshah rem kaba nyngkong jong ki ha kane ka samoi, da kaba shah lamkhmat shuwa haduh lai kol ha ka Mawlai kaba la pynkhihjar lyngba u Samlang Rympei (22’), Fairming Suting (46’) bad u Loving Suting (53’), hynrei u Emanbha Marbaniang (58′, 67′) bad u Deibormame Tongper (64′, 80′) ki la thep mar ar sien ban kyntait ïa ka nam rem bad ruh ban khur pura ïa ki lai point.
Da kane ka namjop, ka Lajong ka la tam shakhmat ïa ka Mawlai ha ka thup kyrdan jong ka SPL 2025. Baroh arliang ki la kamai mar 12 point bad ka Mawlai ka don ruh ïa ka jingïapher kol (goal difference) kaba kham bha (+10 la +8) hynrei ka SLFC ka don ka jingmyntoi da kaba bat ïa ka rekod kaba bha ha ka jingïakhun para maki (head-to-head).
Lah ban kdew ba kawei pat ka klob ban kmen ïa kane ka resol ka dei ka Nangkiew Irat, kaba lamkhmat ïa ka thup kyrdan da kaba kamai 13 poiñ. Ka jingshah rem ha kane ka jingïakhun kan jin da la long kaba ktah ïa ka jingkyrmen jong ka Lajong ban ïada ïa ka nam lahduh ha ka SPL hynrei kane ka jingjop ka la wanrah biang ïa ka jingkyrmen katba ha kawei ka liang ka la buh ïa ka jingeh kaba khraw ïa ka Mawlai.
Haba phai sha ka jingïakhun, ka kylla step ka la kut da tang shi kol jong ka Mawlai kaba la thep da u Samlang.
Ka jingïalehkai ka la sdang ban shongshit ha ka kylla miet, ha kaba u Fairming u la pynkhih ïa ka kol kaba ar na ka bynta ka Mawlai hapoh shi minit mar ïa sdang biang. Tang hadien hynñiew minit, u Loving u la pynbud biang sa kawei ban pynjlan ïa ka kol lamkhmat da 3-0 kol, bad ka jingïaknieh ïa ka lai point ka la paw kumba ka la kut noh ha kane ka khyllipmat.
Hadien ba tam da 3 kol ka Mawlai ka la sdang ban pynduna ban tur shakhmat bad pynjur ka jingïada shadien, pynban, kane ka la long ka jingbakla kaba khraw kaba la ktah ïa ki. Ki la shah ñion ha ka rukom kaba biang bad ka jingsdang jong ka jingwanphai jong ka Lajong ka la sdang lyngba ka kol u rangïalehkai ba mih bujli u Emanbha ha ka minit kaba 58.
Nangta u Deibormame u la thep ïa ka kol kaba ar da ka khlieh ban pynduna ïa ka jingshah lamkhmat, bad u Emanbha u la noh synñiang ïa ka kol kaba la pynïakhaid da kaba pynkhih ïa ka bol kaba la pashat janai da u Banlamkupar Rynjah. Nangta ka kol kaba kongsan tam kaba la pynkhihwin da ka jingkmen ïa ki nongïalehkai shongben jong ka Lajong ka la wan ha ka minit kaba 80 lyngba u Deibor.
Hadien kane ka Mawlai ka la ïaleh katba lah ban wanphai biang sha ka jingïakhun, hynrei kam shym la lah satia. U Deibor u la shah beh noh na ka jingïakhun hadien ba ïoh ïa ka yellow card kaba ar ha ki ar minit ba khatduh hynrei ka por ka la lyngkot eh ïa ka Mawlai ban pynlong ïa kane kum kabu ban tur shakhmat.
Ha kaba khatduh dei ka Lajong kaba la ïoh ban lehkmen katba ki nongïalehkai ka Mawlai ki la leit ban kynthoh ïa ki nongpynïaid ïa ka jingïalehkai, lehse namar ki rai kiba ki sngew ba kim shym la ïaid ha ka lynti jong ki. Hynrei, hadien ba ki la shah rem na ka jingïakhun kaba ki la lamkhmat lypa da 3-0, ki don tang ïalade ban kynnoh katba ka mynsiem ïakhun jong ka Lajong kaba khlem kynran dien ka la long ka jingbam kaba bang bad kaba thiang na ka bynta uwei pa uwei u nongkyrshan phutbol ba la sakhi ïa kane ka jingïalehkai.
Ka SPL 2025 kan wanphai biang ha ka sngi Thohdieng ha kaba ka Malki kan aireng pyrshah ïa ka Rangdajied United ha ka por 4:30 ha ka jingïalehkai ba nyngkong jong ka kylla kaba hynñiew (Round 7).
