Shillong, Risaw 01: U Bah PT Sawkmie, MLA barim u la plie pyrda ïa ka Inter Dong Basketball Cum Awareness Programme on Skill Based Program ba la pynïaid da ka Seng Samla Mawlai Mawroh ryngkat ka Entrepreneurship Development Cell bad ka Community Engagement Cell, Shillong College ha madan basketball jong ka shnong ha Mawlai Mawroh ha ka sngi Saitjain ka 27 tarik u Nailur, 2025.
Haba ai jingkren kum u kongsan u Bah Sawkmie u la ïathuh ba la don iwei i longkmie ba la phah ïa la u khun ban ïakynduh ïa u namar ha ka por long MLA bah PT Sawkmie ki ju ioh jingïarap beit haba u khun jong ka u leit ïalehkai Karate shabar jylla, hynrei mynta ym ju ioh eiei shuh shuh. Kumta u bah Sawkmie u sngewkhia bha haba ïa dei bad kane ka jingeh jong ki khynnah ïalehkai ha kine ki sngi kiba mynta.
Katba na ka liang u Rangbah Shnong ka Mawlai Mawroh u bah BL Lyngdoh u la pynpaw ba ka madan basketball bad ka Indoor Sports Hall kaba don hapoh shnong ka dei ha ka por jong ka jinglong MLA bad Minister u bah PT Sawkmie.
U rangbah shnong u pyntip ruh ba ka shnong kan sa pynlong ïa ka Winter games kaba kin sa sdang ha u bnai Nohprah bad pynkut ha u snem thymmai.
Ha ka jingïakhun plie pyrda kaba ha kane ka sngi ka Mawlyndop ka la jop ïa ka Pdengshnong da 25 la 15.
Ha kane ka inter dong ki don baroh 12 tylli ki team kiba ïa shim bynta, kynthup 7 ka kynhun na ki shynrang bad 5 ka kynhun na ki kynthei. Ha kane ka sngi la ïa don lang ruh u secretary shnong bah Pynsuklang Hynniewta, u President ka seng samla Mawlai Mawroh u bah EP Rynjah, u secretary bah M. Syiem bad kiwei kiwei.
