Kynnoh u MDC Sohra ba ym ju kham ïoh ïa kynduh ïa ki MDC synshar ha ki 6 bnai ba la dep

Shillong Nailur 30: U MDC ka Sohra uba dei ruh u Nongïalam ka Liang pyrshah ha KHADC u Bah TW Chyne haba ai khublei ïa u CEM KHADC ba thymmai u Bah Winston Tony Lyngdoh bad uba pynpaw ka jingkit bok ïa u CEM barim u Bah Shemborlang Rynjah u bym don ha ka met kaba koit ba khiah u la kyrmen ba une u CEM barim un ïoh noh ïa ka met kaba koit ba khiah krat.
“Nga ai khublei ïa u CEM ba thymmai ha kane ka sien kaba ar ban ïa jied biang ïa u CEM ha kane ka samoi treikam. Nga pynpaw ruh ka jingsngewkhia ïa ka jingieh noh kyndit jong u Bah Shemborlang Rynjah hynrei namarba u la pynpaw ba um don ha ka met kaba Koit ba Khiah kumta ngi Kyrmen ba un shait un khlaiñ noh,” pynpaw u Bah Chyne.
U la ong ba na ka Liang Ïatei la khmih lynti ïa ka jingïai bteng ba u CEM thymmai bad ka EC kin trei ban pyndep ïa ki policy ba dangsah.
“Ka por ka dang long lyngkot ba tang 6 bnai hynrei ka por kam ju ap pat ïano ïano hynrei nga khmih lynti ba phin pyndep ïa ki kam bad na ka liang Ïatei ngin ai ka jingkyrshan, ki jingmut halor ki jingbym beit bym biang ki kam. Tang kawei ngi kyrpad ba phin thaw ïa ka sawdong sawkun kaba don jingïajan, ïatreilang namar ha kine ki 6 bnai ka don ka jingthylli kaba jingai bha kaba hap pyndap naba ym ju kham ïoh Koit bad ki EM, kumta dei ban thaw ka jinglong kaba ïajan, ïa sngewthuh jingmut lang kumba long ha ki EC barim ba ka ju don ka jingïajan ïa rung ïamih para MDC,” ong u Bah Chyne.