SHILLONG, Nailur 29: Da kaba bud ïa ka jingbthah jong ka All India Football Federation (AIFF), ka Meghalaya Football Association (MFA) ha ka 29 tarik Nailur, 2025, ka la shim ïa ka rai kaba kongsan ban tehlakam bad pynbeit ha kaba ïadei bad ka jingpynlong ïa ki lympung phutbol ki bym pat ïoh jingbit bad ki bym pat register hapoh ka Jylla.
Katkum ka rai jong ka Executive Committee jong ka MFA, ka dawa ba baroh ki nongpynïaid lane ki nongseng ïa kino ki lympung phutbol ki dei ban pan jingbit shuwa na la ki jong ki District Association ban pynlong ïa kino kino ki lympung phutbol. Nangta ka Association kan sa phah ïa ka jingtyrwa (aplikeshon) sha ka Meghalaya Football Association ban ïoh ïa ka jingmynjur.
Ka MFA ka la kdew ruh ïa ki jingma kiba lah ban mih na ka jingbym kohnguh ïa ki nongïalehkai bad ki referee kiba ïashim bynta ha ki lympung ki bym pat shym la ïoh jingbit.
“Kano kano ka lympung kaba la pynlong khlem ka jingbit jong ki District Association jong ki bad khlem ka jingmynjur jong ka MFA kan ïakynduh ïa ka jingpynshitom kaba tyngeh,” la pule ka kyrwoh jong ka MFA.
Ki nongïalehkai kiba la pynrung kyrteng hapoh ka Central Registration System (CRS) jong ka AIFF bad kito kiba la pynrung kyrteng bad ki kynhun ba la ïasoh bad ka MFA kiba shim bynta ha kum kine ki lympung kin shah pynshitom, kynthup ïa ka kuna bad ka jingshah sospon.
Kumjuh ruh na ka bynta ki Referees/Match Officials kiba la pynrung kyrteng hapoh ka CRS jong ka AIFF bad kiba la pynïasoh bad ka MFA, kiba pynïaid ha kum kine ki lympung kin ïakynduh ïa ka jingshah pynshitom, kynthup ïa ka kuna bad ka jingshah sospon.
Ka MFA ka ai jingmut ïa baroh ki nongseng, ki nongïalehkai, ki referee, bad ki nongpynïaid ba kin bud ryntih ïa kine ki kyndon treikam. ïa kane ka sienjam la shim ban pynthikna ïa ka jingtreikam kaba hok, kaba shai, bad kaba beit na ka bynta ka phutbol ha kylleng ka Meghalaya, katkum ki kyndon bad ka rukom synshar jong ka AIFF.
