Bynñiaw u Symbud Myntri Rangbah ba jyllei ki kam runar ba shu thaw khana

Shillong, Nailur 27 : U Symbud Myntri Rangbah ka Jylla ba khmih ïa ka Kam Pohïing, u Bah Prestone Tynsong u la kyntu ïa ki longïing bad ki kmie ki kpa ban shim ïa ka jingkitkhlieh lang ban pyllait ïa ka imlang sahlang na ki kam runar ba harukom ha ka jylla.
Ïa kane u Symbud Myntri Rangbah u la kren ha ka jingïalang sam khusnam ïa ki samla pule ba la pynkup burom da ka Raid Laban Sports Social and Cultural Organisation (RLSSCO ha kane ka sngi Saitjaiñ ha State Central Library Shillong.
Katkum ka jingong jong u, ha man la ki kam runar kiba jia ha jylla ka jingkynnoh dei beit ïa ka sorkar jylla. “Baroh la shu kynnoh shu kynthoh khlem pyrkhat ba dei ka sorkar kaba leh bad ba u Home Minister ka Jylla u dei u bym larkam,” bynrap biang u Bah Prestone.
Ha kajuh ka por u Symbud Myntri Rangbah u la pyntip ba ki pulit ki la trei borbah na ka bynta ban tehlakam ïa bun jait ki kam runar kiba mih man ka por ha ka jylla.
U ong ruh kumba ki paidbah ki sakhi ba don kiba shu thaw khana ïa ki jingjia ki bym shisha kiba la ktah pat ïa ka imlang sahlang. Kumta u la kyntu ïa ki Kmie ki kpa ba ki dei ban shim lang ïa ki jingkit khlieh khnang ba kum kine ki jingjïa thaw khana ïa ki jingjia ki bym shisha ba kan ym jia shuh ha ka jylla.
Kane ka jingkren jong u Symbud Myntri Rangbah ka dei hadien ki jingjia kiba la pynkhihwin bha ïa ka Jylla na ka jingkynnoh shah dung thyrnia injek bad kiwei kiwei hynrei ynda la tohkit bha ki pulit la lap pynban ba ka dei ka jingjia kaba shu thok ne shu thaw khana khlem da jia satia.