Haduh 444 ngut ki samla bad 77 tylli ki laptop sha ki samla ba pass bha na Shillong South

Shillong, Nailur 27 : U Symbud Myntri Rangbah ka Jylla Bah Prestone Tynsong ha ka sngi Saitjaiñ u la ong ba u itynnad haduh katta katta ïa ka prokram pynkup burom ïa ki samla ba pass bha kaba la pynlong da u MLA ka Shillong South Bah Sanbor Shullai .
Ïa kane u Bah Prestone u la kren kum u Kongsan ha ka jingïalang pynkup burom ïa ki 444 ngut ki samla pule na Shillong South constituency kaba pynlong ha State Central Library Shillong.
Ha kane ka sngi la sam haduh 77 tylli ki laptop bad ki tablet sha ki samla ba pass kham bha nalor kiwei ki khusnam sha ki samla na ki longiing ba duk kiba pass bha bad kumjuh ja ki samla ba la ieh shiteng ïa ka jingpule hynrei ki bteng biang bad pass bha.
” Nga sngewkmen ban ïoh jingtip na u Bah Sanbor ba ka jingdon ki samla ba pass bha na la nang kiew na uwei u snem sha uwei pat. Ban sam khusnam haduh 444 ngut ki samla pule tang na Shillong South kam dei shuh kaba khyndiat,” u la ong
Nangta u ong ruh ba ha ka jylla kaba don 60 tylli ki constituency lada sam mar 444 ngut man u snem, khlem artatien hapoh 5 snem ka Literacy Rate kan poi sha ka 100 persen. U ong ruh ba kane ka sienjam ba leh u Bah Sanbor ka ai mynsiem ïa u ruh ban leh lang kumjuh.
Na ka liang u Bah Sanbor haba kren ha kane ka sngi u la pyntip ba kane kadei ka sien kaba 25 ba ki pynlong ïa kane ka jingsam khusnam ha kaba man u snem ki don da ki spah ngut ki samla kiba shah pynkup burom.
U Bah Sanbor u la ai ka jingkhublei ïa ki principal bad kumjuh ki nonghikai nalor ki nongïalam shnong kiba la shim bynta lang ha katei ka jingpynkup burom.
Ha kane ka jingpynkup burom, u Bah Sanbor u la pynpaw ruh ka jingkmen kaba khraw ba ki ïoh ban bteng sha ka snem kaba 22 ban ithuh ïa ki khun samla ka constituency kiba la pyrshang ban leh bha ha ki jingpule khamtam eh ïa kito ki samla kiba wan na ki longiing kiba kynduh jingeh na ka jingban ka jingduk.