Shillong, Nailur, 27: Kum shi bynta ka jingrakhe ïa ka World Tourism Day, ha ka NIPS Hotel Management ha ka sngi Saitjaiñ ka la mih shakhmat ban pynkhuid ïa ki bynta jong ka ka Golflink kaba dang hap ha u pud u sam jong ka shnong Pynthorbah.
Ha kane ka jingpynkhuid la ïadon lang u Rangbah Shnong jong ka Dorbar Shnong Pynthorbah u Bah S.Marbañiang ryngkat u Bah Nicholas J Kharnami na ka My Meghalaya My pride uba long uwei na ki rangbah uba ju kit khia bha ha kaba ïadei bad ka khuid ka suba ha ki shnong ki thaw, u Centre Incharge jong ka NIPS u Bah Wellborn Kharumnuid, ki nonghikai bad ki samla pule.
Katba ka jingpynkhuid ïa ki ñiut bad ki jaboh jabaiñ ka dang ïaid shakhmat u Bah Nicholas bad ki samla pule ki la lap ïa ki jaiñ ki nep bad ki jaboh jabaiñ bad ïa u mobile number na iwei i slip. Mar mar u Bah Nicholas u la phone ïa ki trai ban wan lum noh ïa ki ñiut ba la bret satah ha kane ka jaka.
Haba u Bah Nicholas u la pyrshang ban kylli lyngba ka telephone halor ka jingpoi jong u ñiut ha katei ka jaka ki la ïathuh ba ki la phah bret ha uwei u khynnah hapoh ka kali ñiut hynrei kaba lyngngoh ka long ba uta u ñiut u la poi pynban ha ka rud surok ha Golflink.
