Nongstoiñ, Nailur 27: Ka skul Edren Memorial Secondary School kaba don ha sor Nongstoiñ, ha ka sngi thohdieng ka la ïoh ban rakhe leh kmen kyrpang ïa ka sngi jong ka jingkynjoh sha u mawmer ba 30 snem. Katei ka shlem kaba la seng ïa ka naduh u snem 1995 da u bah Edrenshon Lyngkhoi (bam kwai ha ïing u Blei).
Ha katei ka sngi u bah Gabriel Wahlang MLA ka Nongstoiñ Constituency, u la wan ban long kum u kongsan ban ïa sakhi lang ïa katei ka sngi bad la synran lang ruh da u Rev. J.L.Mawlong bad kiwei ki riew pawkhmat ka thaiñ bad ka kong Goldstone Syiemlieh Headmistress katei ka Shlem.
U kongsan ha katei ka sngi u la ïoh ban pyllait paidbah ïa ka souvenir jong katei ka skul bad ha kajuh ka por kum ka dak jong ka jingrakhe leh kmen la ïoh ban ot ruh ïa u Cake.
La pynphuh phieng shuh shuh ïa katei ka jingïalang da ki sur jingrwai bad ki jingshad bad kiwei kiwei ki jingpynbyrngia, ha kaba la wan sakhi lang ruh da ki kmie ki kpa bad kiba la pass lyngba katei ka skul bad kiba la longbriew manbriew mynta ha ki kyrdan bapher bapher.
U bah Gabriel Wahlang MLA ka Nongstoiñ haba ai jingkren, u la ong ba u sngewthuh ba ka jingïaid lynti jong ka skul kat haduh ba kan kynjoh sha u mawmer ba 30 snem kam dei kaba suk. Hynrei, kumba u Blei um shym la weng ïa ka duriaw ba saw ha ka por u Moses, pynban u la phiah bad kad arliang ïa ka. Kumta hi ha ka jingim u briew ruh un um weng ïa ki jingeh, hynrei un plie pat da ki lad ki lynti ban poi sha ka thong kam dei ban duh jingkyrmen.
U la kyntu kynpham ïa ki khynnah skul da kaba ong kam pher la ka skul ka rit ne ka heh. Hynrei haba u ba pule u don ïa ka dohnud ban minot, yn ym don ba lah ban khang ïa ka jingangnud ban poi sha ka thong.
