Kyntu u Lat ïa ki nongtrei ka Koit ka Khiah bad paidbah ban treilang halor ka koit ka khiah ki longkmie

Shillong, Nailur 27: U Lat ka jylla Meghalaya, u C.H. U Vijayashankar mynta ka sngi u la kyntu ïa ki nongtrei ka koit ka khiah, bad ïa ki nongïalam shnong ba kin ïatreilang ban ïarap ïa ka jylla Meghalaya ban long ka jylla kaba long ka nuksa ha kaba pyntreikam ïa ka Swasth Nari Sashakt Parivar Abhiyan (SNSPA).
Haba ai jingkren ha kane ka prokram mynta ka sngi ha Tirot Sing Memorial Civil Hospital, Mairang, Eastern West Khasi Hills District, u Lat u la ban jur ïa ka jingdonkam ka koit ka khiah jong ki longkmie.
U Lat u la ban jur ba ka jingpyntreikam kaba ïar ïa ka skhim ym tangba kan pynkhlaiñ ïa ka koit ka khiah jong ki kynthei hynrei kan ïarap ruh ïa ka Jylla ban ïoh ïa ka jingithuh na ka ri na ka bynta ka jingtreikam jong ka.
“Lada ki longkmie jong ka longïing ki long kiba koit ba khiah, kumta ka longïing baroh kawei kan long kaba koit kaba khiah, u Myntri Rangbahduh u la thmu ba kane ka prokram kan poi sha man la ki longkmie, man la ki longïing bad man la ki shnong ki thaw jong ka ri,” u la ong.
U Lat u la pynpaw ruh ka jingsngewkhia halor ka jingkiew jong ki jingeh ha ka koit ka khiah ha ka Jylla, kynthup ïa ka jingpang cancer, tuberculosis, HIV/AIDS, bad ki jingdih pynbuaid. U la ban jur ïa ka jingdonkam ban pynphriang ïa ka jingtip, khamtam pyrshah ïa ka jingdih duma bad jingdih drok, bad u la kyrpad ïa ki nongïalam niam bad ki nongïalam shnong ban don ka bynta kaba radbah.
U Vijayashankar u la sam ïa ki Nutrition Kit sha ki longkmie ba armet, ki Sanitary Pad sha ki khynnah kynthei kiba dang khie samla, bad ki Medical Kit Bag sha ki nongpang TB. U la ïaroh ïa ki sienjam jong ki bor pynïaid district, ki ophisar ka koit ka khiah, bad ki nongtrei ka koit ka khiah ha kaba pynlong ïa kane ka campaign bad ong ba ïa kito kiba la trei bha ha kaba pynïaid shakhmat ïa kane ka sienjam yn pynkup burom na ka liang ka Sorkar Jylla.
Ha kane ka sngi, u Dr. Timothy L. Nonglait, Medical Superintendent jong ka Tirot Sing Memorial Hospital, Mairang u la ong, “Kane ka campaign kam dei tang halor ka jingai jingsumar, ka dei shaphang ka jingbam ba tei met bad ka jingithuh ba ka longkmie kaba koit ba khiah katei ïa ka ïing ka sem kaba koit ba khiah bad ka ri kaba Kiewshaphrang.”
U la bynrap, “Ka Abhiyan ka pynleit jingmut kyrpang ha ki longkmie, ki samla, bad ki khynnah da kaba pynthikna ïa ka jingpynpoi ïa ki jingshakri ban ïada, kyntiew bad pynkoit ha ka imlang sahlang. Kane ka kam kaba kongsan ka dei shi bynta jong ka jingkular jong ngi ban pynkupbor ïa ki longïing, ban tei ïa ki rukom im kiba koit ba khiah bad ban pynurlong ïa ka jingthmu jong ka Viksit Bharat shuwa u snem 2047.”
U la pyntip ba la pynbiang ïa ka hospital da ki jingshakri kiba bun hapoh ka prokram, kynthup ïa ki jingpeit ïa ka koit ka khiah hadien ba la ïoh khun, ka jingai tika ïa ki khynnah, ka jingpeit ïa ka hemoglobin, ka jingpeit ïa ka hypertension, jingpang shini, cancer, ki jingpeit ïa ka jingpang TB bad ki jingai jingïasyllok. U la kren shaphang ka jingpynrung kyrteng ïa ki card ABDM, PMJAY, Aadhaar bad MHIS, ka jingdon jong ki surgery kiba rit bad kiba heh, bad ka jingpynlong ïa ka prokram ai snam ha kaba la don 18 ngut ki nongai snam. Ha ka jingkheiñ kyllum, ka hospital ka ai jingsumar haduh jan 6,000 ngut ki nongpang ha ka shibnai, u la bynrap.