Shillong, Nailur, 27: Ka Office jong u Commissioner for Persons with Disabilities ka la shna ïa ka Meghalaya Sign Bank App, ka lad Digital ka ban ïarap ïa ki briew kiba don jingthud ha ka bor ïohsngew. Ïa kane la pyntip da ka ka Deputy Commissioner for Persons with Disabilities ka Kong Bridget Warshong haba kren ha ka jingrakhe ïa ka International Deaf Day kaba la long ha ka sngi Saitjaiñ ha nongbah Shillong.
Ka la ïathuh ruh ba ka Office jong u Commissioner for Persons with Disabilities ka la shimkhïa ban wanrah ïa ka Diploma in Sign Language Interpretation Course lyngba ka Composite Regional Centre, Shillong ban ai jinghikai ha ki nongbatai ktien ha ka pule ka puthi, ha ka koit ka khiah bad ha kiwei kiwei ki mat ba kham kongsan.
Da kaba pynurlong ïa ka Accessible India Campaign, ka la pyntip ba ka ophis ka la sdang ïa ka prokram hapoh ka Scheme for Implementation of the Rights of Person with Disabilities Act (SIPDA).
“Kine ki jingtrei shitom ki la ïaid ryngkat ryngkat bad ki jingtrei jong ngi halor ka Sign Language, khnang ban pynmyntoi ïa ki briew kiba don jingthud ha ki dkhotmet,” la ong ka Kong Warshong.
Haba pynpaw ka jingsngewnguh ïa u synñiang u bynhei jong ka Meghalaya Deaf Association (MDA) ka Kong Warshong ka la ong, “ka Association ka ju pynlong ïa ki prokram bad ki jingïakob bapher bapher ha ka International Week of the Deaf bad pynphriang ruh ïa ka jingkongsan jong ka Sign Language ha ka jingrakhe ïa ka World Sign Language Day. Kine ki sienjam ki la pynkhlaiñ ïa ka mynsiem jong ki briew kiba don jingthud ha ka bor ïohsngew bad kan long ruh kum ka jingpynkynmaw ïa ngi ïa ka sap ka phong kaba ki briew kiba don jingthud ha ka bor ïohsngew ki don.”
Ka la ong ruh ba la donkam ban pynïar ïa ka jingdon jong ki nongbatai ha ki skul, ki kolej, hospital, kashari, bad ki jaka treikam.“Ngi dei ban kynmaw ba kine ki lad ki lynti kiba ngi ai kim dei satia ki kam leh isynei hynrei ki dei ki hok jong ki briew kiba don jingthud ha ka bor ïohsngew,” la pynkynmaw ka Kong Warshong.
Ïa kane ka jingrakhe la pynlong da ka jingïatreilang bad ka State Resource Centre on Disability Affairs (SRCDA), ka Composite Regional Centre (CRC), Shillong bad ka Meghalaya Deaf Association (MDA).
Ha kane ka sngi, la sakhi lang da u Myntri ka tnat ka Koit ka Khiah ka Sorkar Jylla u Bah Wailadmiki Shylla uba la long kum u kongsan, u Commissioner for Persons with Disabilities, Bah Lyngkor Kynjing, ka Asst. Commissioner for Persons with Disabilities ka Kong Ripaïa Passah, u Secretary jong ka Meghalaya Deaf Association u Bah Johnkit Maring, u President jong ka Federation of Persons with Disabilities u Bah Ferdinand Lyngdoh, ka Director jong ka Ferrando Campus for Inclusive Education, Nongdiengngan ka Sister Merly Tom, Additional CEO ka State Resource Centre on Disability Affairs Dr. N.P Laloo, ki khynnah pule ha ki shlem ai jinghikai bapher bapher bad kiwei kiwei.
U kongsan u la sam ruh ïa ki khusnam bad ki Hearing Aids sha ki briew kiba don jingthud ha ka bor ïohsngew.
