Shillong, Nailur 27: Ka sorkar pdeng ka la mynjur ïa ka jingthung ïa u Justice Soumen Sen, u judge jong Calcutta High Court, kum u Chief Justice ba thymmai ka Meghalaya High Court.
Kane ka rai ka la bud ïa ka jingmynjur ba la shim da ka Supreme Court Collegium ha une u bnai.
Ka jingpynbna kaba la pymih ha ka 26 tarik mynta u bnai ka ong, “Katkum ka bor ba la pynkup da ka clause (1) jong ka Article 217 ka riti synshar jong ka ri India, ka President ka sngewbha ban thung ïa u Justice Soumen Sen, Judge, Calcutta High Court, ban long kum u Chief Justice jong ka Meghalaya High Court ka ban treikam naduh ka tarik ba u la shimti ïa ka ophis.”
U Justice Sen u la pynrung ïalade kum u advocate bad ka Bar Council of West Bengal ha u Kyllalyngkot 1991 bad u la practice ïa kane ka kam la kumba 20 snem ha Calcutta High Court. U la shah kyntiew kyrdan kum u judge jong ka Calcutta High Court ha ka 13 tarik u Ïaïong, 2011.
Ha shwa ba un long u judge, u Justice Sen u la shakri kum u Senior Central Government Advocate, ban mihkhmat ïa ki bor treikam kiba kynthup ïa ka RBI, SEBI, bad SIDBI ha kiba bun ki mukotduma, kynthup ïa ka civil, constitutional, banking, bad kiwei pat ki jingïakajia.
