SHILLONG, Nailur 27: Ka Shooting Association of Meghalaya (SAM) ka la ïoh ban pynlong ïa ka ‘2nd Inter-School Shooting Championship 2025’ kaba jop bad kaba seisoh ha ka 21 tarik Nailur, 2025 ha madan siat (Shooting range) jong ka Assam Regimental Centre, Happy Valley, Shillong.
Kane ka lympung ka la pynïasoh lang ïa 29 ngut ki samla ïakop siat, kynthup ïa ki nongïalehkai ba kyrpang kiba don jingduna ha ka bor ïohsngew, kiba la pyni ïa ka jingtbit, ka jingkut jingmut, bad ka jinglong ryntih jong ki ha kane ka lympung ïakop siat.
Kane ka Championship ba la pynlong da ka SAM, ka thmu ban kyntiew bad phriang ïa ka jingïalehkai siat suloi hapdeng ki khynnah skul ha kajuh ka por ban pynroi ïa ka mynsiem ïakhun kaba koit ba khiah, ka jingïatreilang, bad ka jingïakynduh lang.
Mynta u snem kane ka championship ka la sakhi ïa ka jingïashim bynta na ki 17 tylli ki skul ha kylleng ka Shillong bad Tura, kaba la long ka sienjam kaba kongsan ban pynroi bad saiñdur ïa ki samla kiba don ka sap ha ka siat suloi ha ka Jylla.
Ki skul kiba ïashim bynta ki kynthup ïa: Sherwood (Tura), APS Shillong, KV Happy Valley, All Saints Shillong, St. Edmund’s Shillong, KVS Laitkor, Synod School Jaiaw, HL Mizo SS, Laitumkhrah Presbyterian HSS, Umlynka Presbyterian School, KV Upper Shillong, St. Mary’s Shillong, St. Ann’s SS Mawpat, School & Centre for the Hearing Handicapped Children Shillong, Jyoti Sroat School, bad ka NIOS.
Kane ka lympung ka ai ïa ka rynsan kaba paka tam ïa ki nongïashim bynta ban ïoh ïa ka jingtip bad ka jingshemphang kaba kham bha shaphang ka jingïalehkai ïakop siat bad ka pynpaw ïa ka jingïaryngkat hapdeng ki nongïalehkai, da kaba ai jingithuh kyrpang ïa ki nongïashim bynta kiba don jingduna ka bor ïohsngew.
Haba kren ha kane ka lympung, u President bad u General Secretary ka Shooting Association of Meghalaya, ki la pynpaw ïa ka jingsngewnguh ïa ka Assam Regimental Centre kaba la pynbiang ïa ki jingdonkam bad ka jingkyrshan, da kaba ban jur ïa ka thong ban tei ïa ka nongrim kaba skhem na ka bynta ka jingïalehkai siat suloi ha ki kyrdan ba shapoh.
La pynkut ïa kane ka championship da ka jingsam khusnam, ha kaba ki nongjop ki la shah pynkup burom na ka bynta ka jingïalehkai ba kyrpang bad ka jingaiti lut kaba khlem sangeh jong ki ha ki jingïakhun. Ka jingjop jong kane ka lympung ka pyni ïa ka jingkiew jong ka jingïalehkai siat suloi ha Meghalaya bad ka buh ïa ka lynti na ka bynta kane ka jingïalehkai ha ka thaiñ bad ka ri ha ki por ban wan.
