Jowai, Nailur 26: Ka Jaiñtia Body Building & Fitness Association (JBB&FA) mynta ka sngi saitjaiñ 27 tarik u Nailar 2025 kan pynlong biang ïaka rynsan pyni dohksah ba heh duh ha Nongbah Jowai kaba la tip kum ka “5th All Meghalaya Amateur Body Building Championship Mr. Ironman Amateur 2025” ha District Library Auditorium Mynthong, Jowai.
Lyngba kane ka rynsan kan plie lad ïaki khun samla ka Ri-Lum Jaiñtia ba kin pynpaw pyrthei ïa ka rukom pynwan dur ïaki dohksah. Na ka liang JBB&FA kan sa sam ruh ïa ki khusnam (Award) sha ki nongjop ha ryngkat ka song pisa bad ki Syrnod da ka jingithuh ka Meghalaya Body Building & Fitness Association bad ka World Fitness Federation (WFF).
La pyntip ïa ki Ticket na ka bynta ki paidbah kiba wan sakhi ki lah ban ïoh ha kane hi ka sngi haka jaka ba pynlong ïa kane ka rynsan kiba long kumne: 1) Donors Card Rs.500 bad 2) Executive Class Rs.300 tyngka.
Naka liang u Samla Yoosar Kynjing uba dei u President ka Jaiñtia Body Building & Fitness Association, ula ong ka jingpynlong ïa kane ka rynsan ka long kum shi bynta ban plie lad plie lynti ïa ki khun samla napoh ka Ri-Lum Jaiñtia ban kin pynpaw pyrthei ïa ka sap ka phong ba ki don, kiba jop nangne kin ïoh lad ban mih khmat ïaka jylla ha ki jingïakop bapher bapher hapoh ka Ri. Haka juh ka por ka jingpynlong ïa kane ka rynsan ka long shi bynta yn ïarap pisa ban pynshna ïa ka GYM jong ka Association kaba don ha Panaliar.
Ula ïathuh ruh ba ka jingpynlong ïa kane ka rynsan ka long ruh kum shi bynta ban rakhe ïa ka jingdap 5 snem jong ka jingïaid lynti ka Jaiñtia Body Building & Fitness Association (JBB&FA), Jowai haka jingshakri ïa ki khun samla. Ki jingïakop kin kynthup ïa ka Men’s Body Building/ Men’s Physique/ Women’s Fitness/ Glamour Women’s Fitness/ Denims Jeans Model (Short & Tall).
Na ka liang u bah Flanagan Kharwanlang uba dei President MBB&FA un long kum u kongsan, ha rynkat u ma Puramon Kynjing Daloi Elaka Jowai kum u symbud kongsan, ka por ban thew ïa ki nongshim bynta kan sdang naduh ka 12 baje mynsngi bad ka prokram jingïakop naduh ka 4 baje janmiet.
